Aizawl : Mizoram sorkara home department leh Mizoram Baptist Kohhran thawk dunin Mizoram Police Southern Range hnuaiah Police te taksa, rilru leh thlarau siamtharna ‘Detoxification & Rehabilitation Camp’ an buatsaih tan a, ni 45 awh tur camp hi nimin khan 2nd Bn. MAP Headquarters, Luangmual Recreation Hall-ah hawn a ni.
Hawnna inkhawm hi 2nd Bn.MAP Dy.Commandant K.Beihmotaosa'n a kaihruai a, he huna khuallian 2nd Bn. MAP Comandant Saidingliana bakah Lunglei SP Rex Zarzoliana Vanchhawng leh Camp Director Inspector V.Thawnghua ten thu an sawi a ni.
He Programme hi Home department ruahmanna-a Police te taksa, rilru leh thlarau siamtharna atana buatsaih a ni a, ni 45 awh tura ruahman niin, hemi chhung hian hun hrang hrang pathum ah then in programme duan a ni.
Hun hmasa ber atan Detoxification ni 7 chhung July ni 21-27 hman a ni anga, Christian Hospital Serkawn-a Doctor leh nurse ten an buaipui ang.
Hun 2-na hi ni 10 chhung July 28 atanga August 6 thleng hman a ni anga, thlarau lama intuaitharna hun hmangin Upa RL Thianghlima, Mizoram Evangelical Ministry Team ten Salvation Camping an neih pui ang.
Hun 3-na, a hnuhnung ber ni bawk hian ni 28 chhung August 7 atanga September 3 thleng a awh ang a, Follow-up programme -ah hmangin Counselling, thlarau lama hmasawnna tura infuihna leh Police lam atanga infuih tharna te hmangin hun an hmang dawn a ni.
Detoxification & Rehabilitation Camp ah hian Police thawklai mi 53 tel tura beisei an ni.