Vladimir Putin-a chu a hriselna dinhmun tha lo emaw, hniam deuh emaw tih finfiahna engmah a awm lo tih CIA director-in a sawi.
Kumina kum 70 tling, Putin-a hi chanchinbu hrang hrangte chuan tun hnaiah a hriselna a tha lo niin an chhuah hlawm a, cancer ni thei hiala tar lan a ni.
Mahse, William Burns-a chuan hetianga an sawina hi finfiahna engmah hmuh tur a awm lo tih sawiin, ‘a hrisel hmel hle’ tiin a sawi zawk.
Kremlin pawhin Putin-a hrisel lo anga sawi chu phain phuahchawp mai a nih thu a sawi.
CIA chief-in Putin-a dinhmun a sawi hi United States-in Ukraine hnenah hmun hla zawk kap thei ralthuam a pek belh dawn tih a puan lai mek a ni.
A hmain Russian Foreign Minister Sergei Lavrov chuan khawthlang ramten Ukraine chu an puih zel avangin Russian sipaite Ukraine khawchhak lam chauh hawi lovin huang an zauh tur thu a sawi.
“President Putin-a hriselna hi sawi a tam a, kan hriat theih chinah chuan a hrisel hle zawk a ni,” tiin Burns-a hian Colorado-a Aspen Security Forum-ah a sawi.
Kremlin pawhin Ningani khan president a damlo nia sawi chu an pha bawk.
“Tun hnaiah Ukrainian, American leh British chuan information lama ‘specialist’ an tihte atanga an dawn anga sawiin president dinhmun phuahchawp an vawrh darh nasa a; mahse, dawt vek a ni,” tiin Putin-a thupuangtu, Dmitry Peskov chuan Ningani khan thuthar lakhawmtute hnenah a sawi.
US chuan Russia-in Ukraine a rûnnaah a sipaio 15,000 vel thi tawh ang leh 45,000 vel hliam tuar awm angin a chhut tih Burns chuan a sawi.
Tar lan tawh thin angin Russia hian February atang khan Ukraine rûnin nunau tam tak an raltlan a, hei bakah hian ram pahnih sipai sang tel an thi tawh bawk a ni.