AIZAWL: Mizo Zirlai Pawl (MZP) Headquarters, Kolasib chuan sorkar doctor chhawrlai zinga thenkhat, sorkarin Aizawl atanga sawn chhuah theih loh a nei chu pawi an tih thu an sawi.
Nimina an thuchhuahah, Mizoram sorkarin Aizawl atanga a sawn chhuah theih loh doctor-te hi sorkar atanga hlawh la chunga an Private Clinic chhuahsan duh lo te an nih thu an sawi a. An zinga pakhat phei chu Kolasib-a awm ai chuan a hna bansan duh zawk hial a sawi a ni chu pawi an tih thu sawiin, "Mi rethei leh harsa zawk, thingtlang mite hmuhsitna ah kan ngai a ni. A duh ang ngei hi sorkar pawhin a tihpuitlin sak ngei kan beisei," an ti.
MZP hqrs, Kolasib chuan, Aizawl chhuahsan duhlo mi tlemte te hian doctor tha tak tak, mahni hna a inpe, damlo te tan pawh a inseng zawk thin, mipuite fak rawn doctor dangte hmai an tihbalh avangin, an chungah hian sorkar in action la ngei se an duh tih an sawi.
Non Practising Allowance (NPA) la chung a Clinic nei, mahni office hours chhungah thu zo lo leh hun hmang zo lo tam tak avang hian mi harsa leh rethei zawk te'n nasa takin an tuar a, he'ng te a nih avang hian Clinic nei NPA la an awm a nih chuan sorkarin a rang thei ang ber a tihtawp sak an ngen tih an sawi bawk.