Aizawl: Zoram People’s Movement (ZPM) chuan Mizoram sum dinhmun dik tak mipui hnena a rang thei ang bera puangzar turin finance department changtu, Chief Minister Zoramthanga an phut thu an sawi.
An thuchhuahah ZPM chuan MNF sorkar hian sum leh paia harsatna tawh chhanah vawiin thlenga Covid-19 vang a nih thu sawi uar laia hri avang thoa sorkar laipui atanga sum hmuhte bakah Mizo mipui, kohhran, NGO leh company hrang hrang atanga tanpuina hmuh leh dawn lam an sawi lang ngai lo tih an sawiin, “Sum leh paia kan harsatna tawh chhanah chhuanlam dang dang siam thin mah se, a chhan bulpui ber chu sum enkawl thiam lo sorkar kan hrawn vang a ni,” an ti.
Mizoram sum dinhmun siam tha turin sorkar hian inrenchemna nen tul loa sum hmanna tihtawp a tul mek lai hian, sum dinhmun siam that tumna nei miah loa ang maia a letling thawkin nuamchen chungin ram an hruai a ni ber tia sawiin, “A puk theih zawng zawngah a pung nena rulh leh ngaiin sum min pukpui a ni ber a, bat theih ang ang an ba ta emaw tih mai turte nen min awi nung vel mai mai a ni ber,” an ti bawk.
ZPM chuan state sum - hlawh leh inrelbawlna lama kal tam lutuk te, hmasawnna hnathawhna tur awm lo khawpa awm reng mai te, Centrally Sponsor Scheme (CSS) hmanga inawi nun bakah, heng atana States Matching Share (SMS) tur takngial pawh nei hleithei lo khawpa awm chhante hi sum enkawl kawnga sorkar a hlawhchham vang a ni tih hi phat rual a ni lo tih an sawi.