Govt. Hrangbana College-in nimin khan an zirlai lut tharte lawmna Fresher Social leh zirlai ti thate lawmpuina hun an hmang a, Education Minister Lalchhandama Ralte in khuallian niin a hmanpui.
He zirlai kai tharte lawmna hun an college Golden Hall-a hman hi Dr. Rosaline Varsangzuali, Associate Professor-in a kaihruai a, Dr. Lalbiakzuali, Associate Professor-in college chanchin leh kalphung a sawi a; Principal Lalrochuanga Pachuau-in inlawmna thu a sawi.
Khuallian Lalchhandama Ralte chuan, Govt. Hrangbana College chu Mizorama college tha leh entawn tlak, Mizoram leh hnam tana mi tangkai tak tak lo chher chhuak tawhtu a nih thu a sawi a. Zirlaite chu zirlai ti buai thei thil tinreng laka inthiarfihlim turin a chah a. Zirlai kal chhuak ta O grade result neite hnenah Department Award a hlan bawk.
He hun zirlai kal chhuak, result nei thate hnenah lawmpuina Award chi hrang hrang hlan a ni a. Kumin Under Graduate result tih chhuah takah, College zirlai zinga mark hmu sâng ber Amos Vanlaltleipuia (Political Sc) hnenah R. Zatlaia Award hlan a ni a. Department tina Top 10-a lang phate hnenah Hrangbana Award pek a nih bakah department tina mark hmu sang berte hnenah Merit Award hlan a ni bawk.