Premier League club Brentford chuan central defender Ben Mee chu free transfer in an lalut.
Kum 32 mi hian Burnley hnena kum 11 a khelh hnuah tun nipuiah contract hmang zovin club a chhuahsan a. A club thar hnenah hian kum hnih contract a ziak.
Brentford manager Thomas Frank chuan, “Ben kan lalut thei hi ka lawm tak zet. Kan squad-ah tawnhriat tha leh theihna sang tak a rawn lalut dawn. Burnley-ah Premier League bikah kum ruk chhungin a che tha thei hle.” tiin a fak.
Burnley hi kum 2015 hnua a vawikhatna atan Championship-ah an tla thla a. An player kum upa lam tawhin club an chhuahsan nual.
Kum 2011 khan Manchester City atangin Clarets hi loan in a zawm bawk a, a kum leh August thlaah a nghetin an lalut a, an tlarhnung a defender rinrawl a ni reng thin.
Burnley-ah hian player ang chauh ni lovin team tan a pawimawh hle a. Season liamta khan an manager Sean Dyche an ban hnuah caretaker coach Mike Jackson chu puiin a coaching staff-ah mawhphurhna pek a ni tawh.
Frank chuan a player chungchang hi sawi belhin, “Defense-ah a rilru puthmang hi ka duh a, goal ven dan tur a thiam a, penalty area chhunga invenhim dan a hre hle. Ball inchuh leh goal lut tur dan na tur a hre hle. Kan team-ah hian hruaitu mawhphurhna a la nghal thei dawn a, player dangte a ho khawm tha hle ang.”
“Ke veilam hmang thiam tak a ni a, goal ven leh nawr lamah set piece atang ralthuam tha tak a ni dawn. Kan squad a kan telh tur hi a lawmawm hle.” a ti.
Brentford hian Albania goalkeeper Thomas Strakosha , Hull City forward Keane Lewis-Potter leh Bologna defender Aaron Hickey te tun nipuiah an lalut fel tawh.