Mizoram Chief Information Commissioner Lalnunmawia Chuaungo, IAS (Rtd) chuan nimin khan Administrative Training Institute (ATI) siam RTI Helpline a tlangzarh.
ATI Auditorium-a tlangzarh inkhawmah Lalnunmawia Chuaungo chuan thu sawiin India ram state dangte aiin Mizoram State Public Information Officer (SPIO)-ten mipui tana hna tha taka an thawk thin chu lawmawm a tih thu a sawi a. State thenkhatah RTI Act chhanna tihkhawtlai 3,000 chuangte a awm thin laiin, thla kua kaltaa Mizoram Information Commission a zawm hnuah RTI chhanna tihkhawtlai avanga buaina pali/panga vel bak a la awm loh thu a sawi.
Lalnunmawia Chuaungo chuan SPIO-te chu mipui tana thawk an ni tih hria a, mipui hnen atanga RTI Act kaltlanga zawhna an dawnte chu tha taka lo dawngsawng zel tur leh phurritah ngai loa sorkar langtlang siamna tur leh an hnathawhte puanzarna remchang a nih avangin theihtawp chhuah turin a chah a ni.
CIC chuan sorkar department thenkhat SPIO la inziak lut lo an la awm tih sawiin, hemi chungchangah chief secretary hnenah department zawng zawngte an inziah luh vek theih nan ngenna lehkha a theh lut tawh tih a sawi bawk.
He huna K Lalkroschhuanga, RTI Nodal Officer-in a tar lan danin, sorkar laipui Ministry of Personnel, Public Grievances & Pensions atangin project pakhat hnuaiah Rs nuai 30.48 dawn niin, kawng hrang hranga hmalakna tur zinga pakhat chu helpline siam a ni a, he helpline viltu tur hi thawktu lak a ni tawh a ni.
CIC-in a tlangzarh tak RTI Helpline hi mi tupawhin RTI Dan (RTI act leh rules) hman chungchanga harsatna a neihte a thlenna tur a ni a. Pisa hun chhungin phone (toll Free) - 1800-8893-218 leh Whatsapp - 9863346173 bakah, Facebook - RTI Mizoram, Instagram - RTI Helpline, Mizoram leh Twitter - RTI Helpline, Mizoram kaltlangin engtik lai pawhin hman theih a ni ang.
Helpline tlangzarhnaah hian RTI chungchang lemchan inziahsiak, ATI-in a buatsaih lawmman sem nghal a ni a. A pum puiah C. Lallianngura, MINECO chu pakhatna niin Rs. 10,000 a dawng a, pahnihna H. Hmingthankhuma, Bethlehem Vengthlang niin Rs. 7,000 dawngin, pathumna Grace Lalrinpari Hauzel, Khatla-in Rs 5,000 dawngin, consolation prize dawng mi pathum an awm bawk.