Police leh sorkar thuneitu dangten Indian khawpuia Rohingya raltlante awmna (camp)-a mosque an siam chawp chu an thiat niin an sawi a, a hma lawkin an awmna hi kangmei nasa takin a tichhe tawh bawk.
Mosque hi tarpaulin leh mau hmanga an sak mai mai a ni a, New Delhi chhim lam, Uttar Pradesh state nena an inrina, Madanpur Khader vengah Ningani zing dar 7:00 pelh khan tihchhiat a ni.
Buddhist tamna ram, Myanmar-ah hian sipaiten nasa taka an beih avangin Rohingya hnam mi 300 vel chu India-ah hian an tlanchhe lut a. An biak in hi tichhe lo turin nasa takin ngen mah se thuneitute hian an tichhe ta tho a ni.
Muslim deuh vek, Rohingya hnamte hian pathian biakna tur hmun an nei tawh lo tih an sawi.
“Mosque-a Fajr tawngtai kan hman hnu lawkah an tichhia,” tiin kum 33 mi, Mohammad, 33 chuan a sawi.
“Inthiarna leh intihfainna pindan an tichhe hmasa a, tui herh hawna tichhe lehin mosque hi an tichhe zui a, minute 10 chhungin an tichhe hman vek a ni,” a ti.
Raltlante hian duh lohna lantir an tum a; mahse, thuneitute chuan ‘dan lova pem’ an nih thu leh ‘dan lo bawka ram luah’ an nih thu an hrilh tih a sawi bawk.
“Kan pathian biakna hmun a nih thu ka hrilh pawhin tawng tam lutuk min ti si a ni,” a ti.
“Kan tan chuan mosque hi Hindu-te tana an temple ang bawk hi a ni a. An chet dan hi a dik lo tawp a; mahse, thu kan nei si lo,” a ti.
Mipa naupang, Obaidullah pawhin a thinrim thu a sawi a, mittui tla chungin mosque tihchhiat lai chu a thlir thu leh engmah tihtheih a neih si loh thu a sawi.
A bul hnai, Kalindi Kunj police station-a police hotu chuan an tihchhiat chu mosque a nih loh thu leh buk sak chawp mai mai a nih zawk thu a sawi a, a bak engmah a sawi zui duh lo.
He lai venga subdivisional magistrate Pravir Singh chuan mosque tihchhiat a hriat loh thu a sawi a, hemi chungchang sawi tur a nih loh thu a sawi bawk.
June 13 khan raltlan chhungkaw 50 chuang awmna camp hi a kang vak a, hei hi kum 2018 hnua a kan vawi hnihna a ni.
Hemi tum hian mosque pawh hi tlem a kang a, chenna chânte chu tlawmngai pawlten an awmna tur an ngaihtuahsak.