Aizawl : Mizoram Pradesh Congress Committee (MPCC) President Lalsawta chuan Mizoram sorkar leibat hnem vangin mipui phur a rut chho mek zel nia a lan avangin, ram sum leh pai dinhmun dik tak hi mipuiin hria se an duh tih a sawi.
Nimina Congress Bhavan-a inkhawmah Mizoram sum leh pai dinhmun chungchang tarlanna 'White paper' an ngiat chhan sawiin Congress President Lalsawta hian, "Health Care, Pensions, GP Fund leh sorkar a contract hnathawk te'n rei tak chuang an hmuh tur ang an hmuh theih loh avang hian Mizoram Sorkar hian sum dinhmun hi mipui hriatah puang se kan tih vangin ‘White Paper’ kan ngiat a ni," a ti.
Lalsawta hian MNF sorkar tirh mai, kum 2019 atang khan sorkar leiba hi cheng nuai tam takin a pung chho nghal tih a sawi a. Assembly Session zawhna chhanna atanga an hriat danin, MNF sorkar hian RBI pawn atangin January 2022 thleng khan cheng vbc 3264.65 leiba a puk belh tawh tih a sawi a. Hmasawnna lian tham leh sum hmuh letna (infrastructure investment) hmuh tur awm si loin, duhsak zawng te vur nan sum an hmang nia a lan avangin ram sum leh pai dinhmun dik tak hi mipuiin hria se an duh tih a sawi.
Sorkar laipuiin Mizoram sorkar chu Centrally Sponsored Scheme (CSS) sum zawng zawng anmahni department account-a dah lut vek tura a tih avanga sum harsa tura sorkarin a sawi hi, he'ng CSS sumte hi a hman lohna tur, Revenue Expenditure-ah an lo hmang tam tih a hriat theih a; kalphung pangngai a sum dah tur a nih tak avanga sum leh paia lama harsatna a zualkai tur chhan hi mipui hriata sawifiah tura kan duh vang a nih thu a sawi bawk.