Information Communication Technology Minister Robert Romawia Royte chuan ICT Department, Ministry of Minority Affairs leh NIELIT te tangkawpin Mizoram khaw kilkhawr 7 ah IT zirna an din thar dawn tih a sawi.
He thu hi nimina NIELIT Zuangtui-a zirtirtute tana karkhat awh naupang zirtir kawnga IT hman tangkai chungchanga inzirtirna kharna a hmanpuinaa a sawi.
Robert-a chuan, IT chungchang leh a kaihhnawiha NIELIT in Mizoram sorkar hnuaia thawktu hrang hrang tana training chi hrang hrang an mahni hna mil leh puihna kawnga an buatsaih thin chu Mizoramin a chhawr tangkai hle tih sawiin, "He zirna in hi Mizoram tan a hlu," a ti.
Tunlaia IT leh a kaihhnawih - social media, cartoon leh games te'n naupang hun leh hriatna a ruksak nasa tih sawiin, naupang te chu an chut ta deuh nia a lan thu leh hei hi zirtirtute tan chona lian tak nia a hriat thu a sawi a, "Classroom chhungah engtin nge naupangten an zirlai, nuam takin an zir theih ang tih ngaihtuah chungin, IT leh computer hmangin, zirna hi classroom chhunga kan kalpui leh sengluh a pawimawh hle in ka hria," a ti.
Training kharna programme hi T Gunendra Singh, Director in charge, NIELIT, Aizawl in kaihruaiin, Lalthanzara, Additional SPD, Samagra Shiksha leh Dr. C Lalnuntluanga. President, Mizoram IT Society te pawhin hmanpuiin thusawina hun an nei a ni.
He trainingah hian zirtirtu 572 in Batch ruk, kar khat zel an training a, kumin March ni 24 ah training hi kalpui tan a ni.