Aizawl: Aizawl Municipal Corporation bultumin nimin khan Vanapa Hall-ah kawngsira thil zuarte chawimawina hun hman a ni a, he huna khuallian Deputy Chief minister Tawnluia chuan Mizoramah kawng sira thil zuar sorkara inziak lut 3,500 vel an awm thu a sawi.
Tawnluia chuan Covid-19 lengin ram pum a tihmangan laia Prime Minister Narendra Modi-a’n street vendor-te an harsatna laka chhanchhuahna tur scheme, Prime Minister Street Vendor’s Atma-Nirbhar Nidhi a duang chhuak chu ropui a tih thu a sawi.
Mizoram sorkarin street vendor-te a ngaih pawimawh avangin an hamthatna tur a ngaihtuah thin thu sawiin, tunah hian street vendor 3,500 vel sorkarah inziak lut an awm a, “An zinga 600 velin PM SVANidhi scheme hi an chhawr tangkai,” a ti.
Kawng sira thil zuarte chu an inzawrhna hmun leh an thutnate tihfai kawngah theihtawp chhuah thin tur te, an thil zawrhte fai leh thianghlim taka vawng tur leh anmahni pawh fai taka inenkawl thin turin a chah bawk a ni.
He hunah hian AMC Commissioner Zothanmawia’n inlawmna thu sawiin, UD&PA Director, DAY-NULM Mission Director ni bawk H. Lianzela’n inlawmna thu a sawi a, Aizawl Mayor Lalrinenga Sailo leh Deputy Mayor R. Thanglura te bakah New Delhi atanga he hun hmang tura kal, Naresh Kumar, Under Secretary, MoHUA ten thu an sawi bakah, PM-SVANidhi loan chhawr tangkaitute (beneficiary) atangin an hlawhtlin dan ngaihthlak a ni bawk.
Chawhnu lamah Lending Institutions pahnih, State Bank of India leh Mizoram Rural Bank aiawh mi thiamten digital transaction tih dan tur training an pek bakah, QR Code an sem nghal a, beneficiary-te nen inkawmhona hun an hmang nghal bawk.
Self-Help Group hrang hrangten Vanapa Hall kawtah exhibition an neih bakah Street Food Festival neih a ni bawk.