- Upa Lalthara, Kohima (9436001667)
- BIBLE LEHLIN LEH CHHUT DAN THENKHATAH A THU KEN LEH AWMZIA TIH DANGLAM LUIH A AWM TA EM NI?
5.1 Kan hriat theuh angin Bible hi vawi tam tak lehlin that a lo ni tawh thin a. Bible letlingtute zîngah ngaih dân leh hriat thiam dân a inang vek thei thin lo va. Hei vang hian Bible lehlin (version) hrang hrang a lo awm ta a ni. Sawi dân leh tawngkam inang lo, mahse a thuken tlângpui thuhmun nia ngaih theih ang chi hi chu ngaihmawh tur nia a lan loh laiin, mahni ngaih dân miltîr tum zâwnga Bible thu tihdanglam erawh chu thil fel lo tak a ni ngei ang.
5.2 Khawvel pum huapa Bible Society kan lo neih hnu pawh hian Bible Society-in a pawm theuh theuh Bible lehlin hrang hrang a tam ta khawp mai. Hei vang tak pawh hian Bible châng pakhat emaw, a khawi lâi chauh emaw, ‘a bawplawka thulâk’ an tih ang deuha, vung taka kalpui mai hi a him lohna lai a awm thin. Johana 3:3,7-a Isua thu sawi, mi thenkhatin hrilh fiah an tum dân pawh hi chutianga ‘a bawplawka thu lâk’ kan tih hi a ang riauvin a hriat a; a chhan chu, Bible pumpuiin Pathian chhandamna kal hmang leh chumi changtu nih dân a sawi te, Lal Isua rawngbawl dân leh, mipui hmaa a thu sawite nên pawh a inmil hlei thei tlat lovin a lang.
5.3 Tun tum atân chuan Bible lehlin hrang hrang chhui hran lovin, Lal Isua leh Nikodema inbiakrâwnna hi lo thlîr bîk dâwn ila. Johana 3: 5-21 pumpui hi (châng 9-na-a Nikodeman “Chung thil chu engtin nge a awm theih ang?” ti-a a zawhna tih loh hi chu) Isua thusawi vek a ni a; Johana 3:3-a Isuan ‘gennao anothen’ tih tawngkam a hman awmzia leh, chutiang nih theih dân tur chiang zâwka a hrilhfiahna a ni, kan ti thei ang. Mahse, thil mak tak mai chu, Bible chhut hrang hranga he lai thu an chhut dân a inang ta lo nual mai hi a ni!
5.4 Mizo Bible chhut hmasak (O.V Refrerence/2003)-ah hian Johana 3: 5-21 pumpui hi (châng 9-na tih loh khi chu) Isua thu sawi anga, mi thu sawi chhinchhiahna, inverted comma (“ ”) chhûnga dah vek a ni a. Hei hi a nih dân tur dik tak pawh niin a lang. Sâp Bible lehlin rintlâk bera ngaih, New King James Bible-ah pawh hetiang taka dah a ni a. (Hei âi pawha original zâwk, Authorized King James version-ah hi chuan mi thu sawi kualkhungna, inverted comma hi an dah/ an hmang lo hrim hrim a).
5.5 Mizo Bible chhut hnuhnûn zâwk (Mizo (Lushai) – C.L. Re-editted/2008)-ah hi chuan, Johana 3:5-13 chin zawng chauh hi (châng 9-na tel lovin) Isua thu sawi anga dah a ni ta thung a. Hemi zuitu chiah, Johana 3: 14-21 hi Isua thu sawi anga inverted comma chhûnga dah a ni ve ta tlat lo mai. (Hei hi chu tum neia tih ni hran lovin, Sâp Bible lehlin thar ‘Good News Bible’ behchhana lehlin a nih vang a nih hmel a). Sâp Bible chhuak thar deuh – Good News Bible leh New International Version-ah te pawh hetianga dah a lo ni tawh a. (Bible chhut dang eng emaw zâtah pawh hetianga dah hi a awm mai thei e; mahse, helam hi chu ka chhuizui rih lo). Ka sawi duh chu hei hi a ni: Tûnlai Bible chhut thar thenkhata Johana Bung 3 chhut dân hetia tihdanglama a lo awm ta hi, thil tum leh awmze thûk tak neia tih niin a lang, tih hi a ni.
5.6 Mizo Bible chhut hnuhnûn zâwk (C.L. Re-editted/2008) te, Good News Bible leh NIV Bible ziah dan te hi kan pawm dâwn a nih chuan, hêng zawhna te hi rilruah a lo lang nghal a:
(a) Johana 3:14-21 hi tu thu sawi nge ni ta ang? Bible chang lâr ber leh mite ngaih hlut ber ni-a lang, “Pathianin khawvel a hmangaih êm êm a, chutichuan a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân,” (Jn 3:16) tih pawh hi tu sawi nge ni ta ang le?
(b) Johana hian helaiah hian ama ngaih dân a rawn sawiin, a rawn zep tel ve ta mai em ni? He lâi thu hi chu Johana irâwm chhuak chu ni chuan a lang thei si lo.
(c) A nih loh leh, Johana hian khawi lai emaw atanga a thu hriat, a hriatna hnâr (a source) sawi lovin a rawn suan lût ta ringawt mai em ni zâwk?
5.7 Tin, heti zâwng pawh hian lo ngaihtuah dâwn ta ila: Johana 3:14-21 hi Isua thu sawi a nih si loh chuan, Nikodema zawhnate kha Isuan chhâng mumal lovin a namnul liam ta mai, tihna em ni ang le? Chuti lo ni ta se, Nikodema khân ‘gennao annothen’ tih awmzia kha eng tin nge a lo hriat thiam tâk si a, Isua tantu leh a ruang rimtuia sâwngbâwltu a lo nih tâk si le?
5.8 Sawi tam ngai lovin, a chunga zawhna kan siamte chhânna tur chu kan hre nghal mai âwm e. Thu dik tak nia lang chu Johana 3:14-21 hi Isua thu sawi leh a tawngkam ngei ziahna a ni a; Lal Isuan ‘gennao anothen’ tih awmzia leh, ‘gennao anothen’ nih theih dân a sawi fiahna a ni a. Chutah chuan, Johana 3:16 hi, amah Isua ngei kha Pathian Fapa, mihringte chhandam tura Pathianin he khawvêla a rawn tirh/ a rawn pêk chu a ni tih ringa pawmte chuan chatuan nunna an nei a, chûng mite chu ‘chung lam hrin’ (gennao anothen) a tihte chu an ni, tia Isuan a sawina a ni.
5.9. Chuti ni si, eng vangin nge Johana 3:14-21 hi Lal Isua thu sawi ni lo, thu tlahlang, khawi lai emaw atanga lâk chhâwn ang maia Bible thenkhata dah a lo nih tâk mai? Hei hi tihsual palh nge ni ang a, tihluih? Bible chhutte rêng rêng hi ngun taka vawi tam tak ennawn hnua tih a ni thin a; chuvangin he thil hi chu tihpalh emaw, chhutsual emaw chu a nih a rinawm lo. Tunlaia ‘pian tharna theology’ buaipuituten ‘pian tharna’ awmzia ni-a an sawi thin leh helai Johana 3:16 thu hi a inmil loh avang hian, Johana 3:16 hi Lal Isua thu sawi ngei, ‘gennao anothen’ (‘pian tharna’ tih tlukpuia kan lo ngaih thin) awmzia leh, ‘gennao anothen’ nih theihna kawng awm chhun a sawi fiahna a ni, tih mi thenkhatin thup/ thaibo an tumna a ni thei ang em, tih hi zawhna awm thei a ni ta.
(la chhunzawm tur)