Congress Thalai, MPYCC-in nimina ‘Mipui Thlavang Hauhna Inkhawm’ an huaihawtah thu sawiin Congress Treasurer Zodintluanga Ralte chuan, “Kan sum dinhmun a chhe tual tual a, kan chief minister sum dinhmun erawh a that tual tual kan ring,” a ti.
Aizawl Tennis Court bula inkhawm huaihawtah Zodintluanga Ralte chuan Congress sorkarin MNF hun hmasaa sum dinhmun tluchhia a siam that vek bakah sum tam tak an hnutchhiah tih a sawi a. Covid-19 vangin sum harsa tia chief minister-in a sawi laiin, Covid tuar nasa zawk hmarchhak state dangten hmasawnna kawng an zawh mup mup a, an chief minsiter-ten Covid vanga an sum dinhmun chhiat thu an aupui ve ngai lo tih a sawi.
Congress Legislature Party (CLP) Leader Zodintluanga Ralte hian chief minister berin sum a harsat thu a sawi leh tak mek laiin, airport cute ber a buaipuia Kamrula leh ama unau fapa chuan cheng vaibelchhe tam tak man contract an thawk thei reng tih a sawi a. MNF minister-te an ro em em laiin amah CM leh a minister chuam erawhin thawh sen loh hna an nei tih a sawi.
Congress sorkar laiin sorkar hnathawkten a hun takah hlawh an la tih sawiin, “Tunah erawh sorkar hnathawkten thla tira an thla bi hlawh lak chu news a tling tawh a ni,” a ti a. Mi harsate an dam loh nikhuaa health care bill ba a tam chhan chu finance changtu chief minister sum enkawl thiam loh vang a nih thu a sawi bawk.
Zodintluanga Ralte chuan, “Keini ang state lakluh nei tlemah chuan state hausa nih chu a har ang. Mahse, duhamna tel loa ram hmangaihtuten thiam taka sum an enkawl chuan rethei lutuk loin a awm theih tih erawh Pu Lalsawta’n a lo lantir tawh a ni,” a ti.
‘Mipui Thlavang Hauhna Inkhawm’ huaihawtah hian MPCC Secretary John Siamkunga, MPYCC President Dr Lalmalsawma Nghaka, MPCC Secretary, Rosiamngheta, Councill AMC leh Vanlalzuiliana, President, ADC ten thu an sawi theuh bawk.
Inkhawmah hian MPYCC chuan resolution siamin Mizoram sorkarin damlo healthcare bill ba Rs. vaibelchhe 67 chuang chu July 20, 2022 hmaa MPYCC-in chief minister hnena lehkha an theh luh tihlawhtling thuai tur te, grape wine thahnem tak an mansak hnua thi ta, Lalhriatpuii (L) chhungte hnenah July 13, 2022 hma ngeia zangnadawmna Rs. nuai 100 pe tura an phutna leh, grape wine zawrh lai an mansakte pe let thuai turin leh Champhai leh a chhehvel khuaa grape chingtute harsatna sukianga an chungthu rel fel vat turin MLP Act, 2019 leh MLP Rules a pawm danah thutlukna chiang tak puangzar vat tura an phut thu te, National Health Mission (NHM) hnuaia thawkte thil phutah hmalak nghal a nih tur thu sawi chu chhuanlam dang siam loa rang taka tihlawhtlin turte resolution an pass a ni.