Sri Lanka-a venhim hna thawktute chuan Zirtawpni tuk khan an khawpui bera sorkar duh lohna lantirtute inkulhna an luhchilh a, man nualin an puan inte an tihchhiatsak.
Colombo khawpuiah hian sipai leh police commando thahnem tak chuan president pisa kawt maia pungkhawmte awmna an luhchilh a, hei hi duh lotuten kal kian an tum hun hma lawkah a ni.
BBC video journalist chu sipaiten kut an thlak a, sipai pakhatin a phone chhuhsakin a video lakte a paihsak bawk.
Police-in mi pakua an man a, an zinga pahnih hi hliam tuar an ni nghe nghe.
Police chuan an chet lakna chu ‘presidential secretariat lak leh tuma a bik taka beihpui thlakna’ tiin an sawi.
BBC-a thawkin kut a tawrh chungchangah police thupuangtu pakhat chuan an hriatpui loh thu a sawi.
Gotabaya Rajapaksa-a’n kar hmasaa an ram a chhuahsan hnuah Ranil Wickremesinghe chu Ningani khan president atan lak luh a ni a, a tukah chiah sorkar duh lova pungkhawmte lakah hetiang hi a thleng zui a ni.
Prime minister hlui, Wickremesinghe hi mipuiah a tla na lo sa hle a, sorkar duh lohna lantirtute lakah na taka a chet tur thu a lo sawi tawh bawk.
Hetih lai hian Zirtawpni khan politician hlun tak, Rajapaksa tana rinawm tak ni bawka an sawi, Dinesh Gunawardena chu prime minister thar atan rinawmna thu tiamtira lak luh a ni a, Wickremesinghe ai a awh dawn.
Tar lan tawh thin angin Sri Lanka hian eibar dinhmuna hniam tak an tawn avangin mipui an thinrim a, Rajapaksa kaihhruai sorkar an duh lo va, hetih laia prime minister, Wickremesinghe pawh bâng turin an nawr tel a ni.
An mi duh ni lo mah se Wickremesinghe lak luh a nih hnuah mipuite hian buaina an siam zui lo va. Tha an tih ni lo mah se mi thenkhat chuan an ram hruai hna chu a kutah dahin an dinhmun a siam tha thei em tih ngaihchan an tum tih an sawi.
President atana lak luh a nih hnu lawkah sorkar paih thlak tum emaw, sorkar hmun luah emaw chu ‘a mipui rorelna kalhmang lo va, dan kalh a ni’ tiin a sawi.
Zirtawpni tukah khan venhim hnathawktute chu thawk chhuakin duh lohna lantirtute inkulhna an luhchilh ta a. Hemi hma hian mipuite hian sorkar hmun an luah mek chu sorkar kuta hlan let an tum thu an lo sawi tawh a ni.
Venhim hna thawktute hi an thawk hma hle a, an ram sanaa Zirtawpni zing dar 1:00 velah a ni a. An um chhuah zawh hnuah helai hmun panna kawngpui zawng zawng an dangchat nghal bawk.
Zirtawpni chawhnuah khan venhin hnathawktute leh mipui inepna a thleng leh deuh va, mi 100 rual vel chu president pisa kawta vengtu indin thuah tlatte chu an hmachhawn a; mahse, buaina lian a chhuak lo.
Sorkarin tharuma amah duh lotute laka chet a thawh hi dan lam atang pawhin sawiseltu an tam.
“Tul lo taka tharum nena chetna hian he ram hi a pui lo va, khawvel laka a lan dan pawh engmah a siam tha lo,” tiin an rama Bar Association hruaitu, Saliya Peiris chuan a sawi.
British High Commissioner to Sri Lanka, Sarah Hulton pawhin a dem thu a sawi.