Kum 2013-14 chho vel Chakma Autonomous District Council hnuaia development fund Rs. nuai 137 chuang hman sual thubuaiah khatihlaia chief executive member (CEM), tuna Tuichawng bialtu MLA ni lai, Dr. BD Chakma; CEM ni mek, Budha Lila Chakma bakah mi 11-te chu Court of Special Judge-in thiam loh a chantir a, a hremna tur chu July 25, 2022-ah puan a ni dawn.
Special Judge (Prevention of Corruption Act) Vanlalenmawia chuan nimin khan thuremna tichhuak a, heta tar lan a nih danin thiam loh chantir tak mi 13-te hian kum 2013-14 chho khan sorkar laipui atanga hmasawnna hnathawhna tur sum lo kal, Development Fund Rs 1,37,10,147 chu hlawh atan an lo hmang a, thubuai chhui lai hian rul leh vek mah se an chet dan hi dan kalh a nih avangin thiam loh chantir an ni.
Special Court, PC Act-in thiam loh a chantirte hi khatihlaia CADC-a chief executive member, tuna BJP MLA Dr BD Chakma; tuna CADC-a MNF sorkara chief executive member ni lai mek, Buddha Lila Chakma leh district council-a member ni lai pali - Ajoy Kumar Chakma, Buban Kumar Chakma, Mohan Chakma leh Amit Kumar Chakma te an ni a.
Anni bakah hian kum 2013-14 chho vela Member of District Council (MDC) Amar Smriti Chakma, Adikanta Tongchangya, Parimal Chakma, Susen Chakma, Taranisen Chakma, Sushil Kumar Chakma leh Chitra Kumar Chakma te an ni.
Thudawn danin kum 2018 khan khatihlaia BJP Mizoram Pradesh-a General Secretary Vanlalhmuaka chuan CADC sum tihchingpen chungchangah hian complaint hi a theh lut a, Anti-Corruption Bureau (ACB) police station-in kum 2018 vek khan thubuai hi an ziak lut a ni.
Court thuremna puan a nih hnua The Zozam Times zawhna chhangin Dr BD Chakma, MLA chuan development fund sum hlawh atana an hman hi an laka thubuai thehluh a nih hmain an lo rul fel vek tawh tih a sawi a, hetiang a ni chunga thiam loh chantir a ni chu hremna thuah hnih nia a ngaih thu a sawi.
Dr BD Chakma chuan tuna court thuremna chu a pawm theih loh thu sawiin court sang zawkah khin let ngei a tum thu a sawi bawk a ni.