Aizawl: Assam Rifles chuan Inrinni khan Lammual-ah Assam Rifles leh Indian Army bâng tawhte intawhkhawmna rûnpui, Joint Ex-Servicement Rally an buatsaih a. Assam Rifles hotulu ber, Lieutenant General PC Nair, AVSM, YSM, Director General Assam Rifles-in a hman pui.
Lt. Gen PC Nair chuan thu sawiin sipai bâng tawhte chu ram venhimna atana an that lai hun pum an hmang chu ropui tiin an inpekna chu fakawm a tih thu a sawi a. Ram tana nunna hlan sipaite chu ramin a theihngilh dawn lo a, an nupui fanaute chu a theih angin sorkarin a chhawmdawl thin tih a sawi.
Rally-ah hian sipai bângte leh sipai nupui, an pasal ram tana nunna hlante kawmin an harsatnate a sawipui nghal bawk.
Rally-ah hian sipai bâng (ex-serviceman) mi 484 (officer 9; JCO 38 leh other rank 437); ram tana nunna hlan sipai nupui, Veer Nari pasarih leh sipai nupui, an pasal sun tawh mi 66-te an tel a ni.
Anni bakah hian sipai tang lai nupui fanau mi 87 an tel bawk.
Rally-ah hian ex-servicement leh an chhungten document lama fel lo leh pension chungchanga harsatna thlentu mi 55 zingah 39 chu a hmuna tihfel nghal a ni a. Medical camp leh dental camp bakah bank hrang hrangte leh Mizoram sorkar department – LESDE, horticulture, sainik welfare leh AYUSH te pawhin stall an siam a ni.