- Lallunghnema, Charity Lodge
Ka article chhuak hnuhnung berah khan tum hnai lawka ka tawn hriat thenkhat ka rawn sawi a. Chhiartuten chhiar man hla an tih thu ka dawng nual. Bus neitu pakhatin passenger te zinga kum upa tawh te, rualbanlote tana concession a siam thu ka han tarlang kha a ni a. Chu bakah sumo driver pakhat felzia ka rawn sawi chhuak bawk a. Heng mi pahnih, chi hnih te hi an entawn tlak a, mite tan an luang chhuak a ni. Anni ang hi Zoram khawvel mipui zingah hian an tam lo hle a. Kan zawng mek a ni.
He article ka buatsaih lai hian tlangval pakhat lehkhathiam tak mai chuan a thil chah delivery chungchanga harsatna a tawh chu ka han buaipui leh zak zak a. Bungraw phurtu ( courier) leh bungraw neitute inkar chu sawi fel titih a ni a . Kan han lawm phawt chu a ni a. Luhlul chhuah an awm tawh loturah ka ngai.On-line shopping home delivery chungchang hi kan sawi fo tawh thin a. Direct selling a nih avangin home delivery hi a system awm chhun chu a ni a. Chuvangin transport – courier te hian home delivery hi an lo hnial tur a ni lo. Tih ngei ngei tur a ni ringawt mai a ni. Helai hi chu kan kalsan ang. Kan sawi zing tawh lutuk,a ninawm zo zai ta!
Tin, heti hi a ni a,Charity Lodge a hmangaih ber leh duh berte nena arsa pum chhum kan kil zawh hnu chuan, ka tih dan pangngaiin Neem patta tui no khat piau ka in a.Kan sitting Room zim teah chuan ka phone ka han kheuh va,goole news chu ka han bih a.Ka mit a la ta zar mai.Mizo tawngin ka let(translated) nghal a.He ti hian ka han duang chhuak ta a ni.
Times of India July 15 chhuakah chuan State Bank of India Darward Branch chu loan ba lo pui, loan thinna(notice for loan recovery) an pek avangin Rs. 1.1 lakh chawi tur tih a nih tak thu tarlan a ni a. Chu chu Zoram consumer te lo hriat atan ka han thai thuak thuak a ni. Karnataka State-a khaw pakhata cheng K. Shetty chu SBI Darward Branch chuan loan rul tura hriattirna vawi eng emaw zat an pe a. He vaipa, K. Shetty hian loan a bat loh thu a hrilh a. Mahse, he SBI Branch hian loan rul tura hriattirna an pe leh thin a, chubakah Shetty hian loan a rulh theih loh chuan Lok Adalat-a an khin tur thu an hriattir bawk a. Heti teh hrepa buaina a tawh avang hian Shetty chuan Darward District Consumer Disputes Redressal Commission hnenah complaint an thehlut ta a ni. A khing tihna a nih chu. Commission hian complaint chu a ngaihtuah nghal a. SBI lam hotute chu thil awmdan an zawt fiahin an chhui ta a. Shetty hian loan a lo ba reng reng lo mai a. Tichuan, Consumer Commission chuan deficiency in service a puhin SBI hi cheng nuai khat leh sing khat chawi turin a ti ta a. Chu chu Shetty hnena hlan tur a ni.
Heng ral khata consumer thubuai ka han tarlan chhan hi eng dang vang mah a ni law, ringlo mi mahin an dikna leh chanvo an humhalh ngam chuan keini engkim tithei Pathian ringtute hi chuan anni ai hian kan pau khauh nasa zawkin kan huaisen zawk tur a ni dawn lo’m ni? Mizo ho hi chuan ni mai mai teh se, ka hre thiam ta mai, ka ngaidam ta mai, tih kan ching. In ti fel leh inti thlarau mi em em in Pathian ka rawn e, ba le, kan ti! Kan at vang mai mai a nih hi. Dan bawhchhe tawk lekin kan inti Kristian a, sual khawi ngam tawk lekin kan intifel te hi sim a hun tawh zawk. Dawihzep tawk lek a, Kohhrana inhman hi Pathian pawn tha a tih ka ring lo.
Consumer te chhanchhuak turin sawrkarin hma a la zel a. Tun hnai lawk July ni 14 khan FCS&CA Secy. Pi Ramdinliani chuan District hrang hrang a President tharte appointment a ti chhuak a. Hei hi mipuiin hriat a tha ang. Hei hi Consumer Protection Rules, 2021 tanchhan a thutlukna bawhzuiin siam a ni.
Sl. No. 1/ Dist.Commission – Champhai/ President – Dist. & Session Judge, Champhai Judicial Dist.
2/Dist. Commission – Kolasib/President – Judge Fast Track Court-cum AD&JJ, Kolasib Dist.
3/Dis. Commission – Lawngtlai/President – Judge, Fast Track Court-cum-AD&JJ, Siaha Dist.
4/Lunglei/President – Dist. & Session Judge, Lunglei Judicial Dist.
5/Mamit/President – Additional Dist. Session Judge, Aizawl Dist.
6/Serchhip /Judge, Special Court ND & PS Act, Aizawl
7/Siaha/Judge, Fast TrackCoirt-cum-AD&JJ, Siaha Dist.
8/Hnahthial/Addl.Dist.&Session Judge, Lunglei Dist.
9/ Khawzawl/Addl.District Session Judge, Champhai Dist.
10/Saitual/Addl.Dist.& Session Judge II, Aizawl Dist.
Sawrkar hian dan angin appointment a siam a. Dan anga chak taka hnathawk turin mipuiin kan lo beisei dawn a ni. Consumer Commission te hi social court an nih angin mipui vantlang thatna tura thawk turin kan beisei a ni. Aizawl District Commission hi full fledged commission a la nuh hmel a. President pawhin full-time in a thawk mek a ni. District danga President te pawh hian Consumer Commission hi civil court anga an kalpui loh hram beisei ila. Commission hi consumer te tan a ni din liau liau a ni. A pawimawh ber chu court thleng lo va harsatna chinfel leh consumer commission pumpelh hi a him ber a ni.
Consumer Court hi khawvela court rang ber(quickest court) an ti thin.Harsatna I neih chuan min pan thei,fee a awm lo.I chawi tur chu lawmthu sawi a ni.