Manipur Police chuan Ningani zan khan ruihhlo chi khat, brown sugar kg 41 zet an man a, hei hi Rs Vbc 164 man zet niin mi pahnih an man tel.
Lilong Haorou Hangamthambi, Thoubal district-ah heng ruihhlo hi an man a. Brown sugar siamna hmun chungchanga an thu dawn bawhzuiin Thoubal police hian Md. Tomba Phundreimayum-a chenna in chu dapin an man ta niin Superintendent of Police (Thoubal) Sarangthem Ibomcha Singh chuan a sawi.
Police team hian kg 41 zeta rit brown sugar hi bag pathum chhungah, morphinated liquid litre 110, limbu kg 5.28 bag leh ammonium chloride ni ngeia hriat kg 1.274 nen an man a. Mobile phone pahnih an man tel bawk.
Police hian mi pahnih, Md. Saukat Ali (35) leh Chinneilam Haokip (28) an man tel a, heng mite hi dan phal loh damdawi siam chhuahnaa inhnam-hnawih niin an hriat.
An mi man baka anmahni nena inzawmna nei nia hriat mi pathum pawh an hre tawh a, heng mite hi man tumin an bawhzui mek a. FIR pawh Lilong police station-ah an ziak lut tawh.