Aizawl : BJP Mizoram Pradesh President Vanlalhmuaka chuan Mizoram sorkarin Centrally Sponsored Scheme (CSS) sum te a nih dan tur anga hman a nih vat thin loh avangin mi tam takin harsatna an tawh phah thin tih a sawi.
Inrinnia West Phaileng Bazar-a vantlang inkhawm an buatsaihah thu sawiin Vanlalhmuaka hian, central scheme hrang hrang tih hlawhtlin kawngah Mizoram sorkarin hma a la tha tawk lo hle tih a sawi a. "He'ng scheme hrang hrang kalpui a nih danah hian Mizoram sorkar hian hma a lak that tawk loh avangin mirethei zawkte'n an chanvo chan tur chan loh phah avangin a pawi a ni," a ti.
Vanlalhmuaka hian July 2-3, 2022-a BJP National Executive Meeting-ah CSS Project kalpui a nih dan leh state in an kalpui dan report a pek atanga rei vak lohah central sorkar-in CSS sum hman dan thar a duang ta chu CSS kaltlanga hnathawkte tan malsawmna nasa a thlen ngei a beisei thu a sawi.
BJP Mizoram President hian PM scheme hrang hrang hmangte hian Mizo mipui, mirethei tam tak te'n hamthatna an dawng tawh a, an dawng mek zel bawk tih a sawi a. Housing For All bik-ah chuan Completion Certificate dawng, nimahsela sum pakhat mah dawng silo Mizoramah tam tak an awm avangin sorkar laipuiah report siamin an thlen tur thu a sawi.
Ministry of Road Transport & Highway changtu minister Nitin Gadkari hnenah Dampa bial chhung kawng chhiat chungchang a thlen chu ruahmanna siam nghalin, Tut atanga West Phaileng leh West Phaileng atanga Marpara thleng kawngchhia chu siam thuai anih tur thu Nitin Gadkari hian a puang dawn tih a sawi bawk.