AZL: Mizoram a Fire & Emergency Services Department chuan an din champha kum 50-na pualin hnatlang rûnpui an nei.
Mizoram pum puia fire station 14-te chuan fire tender nen thawk chhuakin vantlang hmun pawimawh hrang hrang - zun in, luikawr, bazar leh vantlang kawngte an tifai a ni.
Fire & Emergency Services, Mizoram hi kum 1972 a ding tan a ni a. Kumin 2022 hi an kum 50-na a nih angin a lawmna peng khat atan vantlang hmun thenkhat thlan bikte tifaiin an hnatlang a. Duty pawimawh dang avanga he ni hmang thei lote pawhin hun remchangah an hmang dawn a ni.
July 27, 2022 hian an din champha pualin blood donation camp pawh department chhunga thawkten an nei dawn leh a. He ni pual hian souvenir magazine tihchhuah leh lawmna programme hi September 1, 2022 hian neih tumin an inbuatsaih mek bawk a ni.