Aizawl: Aizawl Mayor Lalrinenga Sailo-in Aizawl Municipal Corporation (AMC) chu hnathawk tak tak tur chuan thuam chak a la ngai hle tih Second Mizoram Finance Commission hmaah a sawi.
Second Mizoram Finance Commission hotute chu Zirtawpni khan AMC office, Thuampuiah lengin an zirchiang a, he hunah hian Lalrinenga Sailo chuan AMC-ah hian 12th Schedule of Indian Constitution-in function transfer tur a tih zingah tam tak transfer a ni tawh chungin hnathawk tak tak tur chuan AMC hi thuam chak a la ngai hle tih a sawi a ni.
AMC-a councillor-te thawhhona a that thu mayor chuan sawiin, party pawh sawi loin ward fund pawh a inzata an insem thin thu te a sawi a. Mizoram Finance Commission-ten an office-a zirchianna an rawn nei chu a lawm thu leh AMC dinhmun hre chunga rawtna tha tak an siam ngei a beisei thu a sawi bawk a ni.
Mizoram Finance Commission Chairman F. Vanlalruata chuan commission-in Urban Local Bodies, Automonous District Councils leh Rural Local Bodies-te sum dinhmun zirchiangin, sorkar atanga pawisa pek chhuah dan turah rawtna an siam tur thu a sawi a; chu chuan Mizoram tan thil tha a thlen ngei a beisei thu a sawi bawk.
AMC councillor-ten Aizawl khawpui tana chak zawka hnathawh theihna tur rawtna hrang hrang an neihte commission hotute hmaah an sawi chhuak a. ULB kenkawh tura central sorkarin scheme a duante AMC kutah dah a la nih loh thu te, AMC chu kum 10 chuang ding tawhin chak takin a thang mek a; chuvangin, project lian zawk thawk thei turin a rintlak tawh tih chu state sorkar pawhin hriatpui se an duh thu an sawi.
Councillor-te chuan project hrang hrang an thawh tawhte a that hle thu sawiin an hnathawhte hian project lian zawk khawih thei tura an rintlakzia a pho lang tih te, thiamna kawngah pawh hnathawktute an rintlak hle tih leh project lian zawk hmachhawp hrang hrang an neih te tar langin, a thawhna tur sum pawh state sorkarin a pek chhunzawm an beisei thute an tar lang bawk.