AIZAWL: Kau-Tlabung Mini Hydel Project chu P&E Minister R. Lalzirliana chuan Zirtawpni khan tlawhin, he project tihchangtlun a nih theih dan tur hrang hrang thawktute a sawi pui.
P&E Minister R Lalzirliana chuan Kau-Tlabung Hydel Project a tlawh chhan sawiin, kawlphetha siamchhuak tura tuikhuah siama ram zau tak tak tui chim tir chu that lohna tam tak a awm theih avangin, tuikhuah awmsate cheibawla kawlphetha tam zawk siamchhuak tura ngaihtuahna an sen thu leh chumi atan chuan a cheibawl dan a awm thei em tihte ngaihtuaha tlawh a nih thu a sawi.
Kau-Tlabung Hydel Project tuikhuah te lian zawka siam theih dan tur a awm leh awm loh te enin, thawktute awmna hmun ni thin, building chhiat avanga luah chhunzawm theih tak loh te, he tuikhuah atanga kawlphetha siamchhuah a nih theihna tura tui lakna te leh kawlphetha siamchhuahna hmun, Power House te a tlawh a, thawktu te'n an hnathawh dan hrang hrang te an hrilhfiah a ni.
Tuna tuikhuah awm mek chu sang zawka khuapa kawlphetha tam zawk siam theih a nih dan tur leh chumi atan chuan a tuikhuah thuthmun te a tha tawk em tih te pawh P&E Minister hian en nghalin, department hotute nen hmalak zel dan tur an la sawiho leh tur thu a sawi bawk.
P&E Minister hi P&E depratment-a SE (Transmission Circle) C. Lallawmsanga leh P&E Serchhip Division-a Sr. Executive Engineer Laltlanthanga te'n an tawiawm a ni.
Kau-Tlabung Hydel Project hi May 5, 2005 khan hman theih tura hawn a ni a, kawlphetha MW 3 siamchhuak thei turin kawlphetha MW 1.5 siamna khawl pahnih dah a ni a, helai hmun enkawltute chuan tun dinhmunah kawlphetha an siamchhuah theih tam lai berin MW 2.4 vel a nih thu an sawi bawk.