Aizawl : Lawngtlai Bawrhsap Amol Srivastava-a’n Inrinni khan Lawngtlai leh Kawlchaw ‘W’ inkar national highway zauh hna thawh mek tlawhin, a enfiah a. Hnathawktute leh hna enkawltu nen hmalak zel dan tur an sawiho.
Lawngtlai Bawrhsap National highway zauh hna enkawltu National highway infrastructure development limited (NHIDCL) hotute, hna viltu intercontinental consultants and technocrats pvt. ltd (ICT) leh hnathawktu Power mech projects ltd (PMPL) hotu ten an hnathawh tawh chin dinhmun leh harsatna an neih te, an thawh chhunzawm dan tur ruahmanna te an lo hrilhfiah a. Bawrhsap chuan kawng laihna leivung paihin ram leilung, lui dung leh ramngaw a tihchhiat loh na tura leivung paihna tur hmun (spoil bank) an ruahman dan leh kawng laihna leivung an paih dan te enfiahin, ram leilung tichhe lo thei ang ber tura leivung paih tur leh tha tak si, chak tak sia hnathawk turin a hrilh.
Sorkar thuchhuahin a tarlan danin, national highway-54 zauh hnathawh mek hi package riatah then niin, Lawngtlai college venga 71 RCC atanga Siaha district chhunga Zero (Maubawk) thleng package-7 a ni a. NHIDCL enkawlna hnuaiah PMPL-in he hna hi an thawk. Lawngtlai district huam chinah, 71 RCC leh Kawlchaw 'W' inkarah leivung paihna (spoil bank) ruahman sa 5 awmin, ram neitute nena inbiakremna anga leivung chhunkhahna hmun (dumping area) 8 a awm bawk. NH-54 zauh hna package-7 hi April 2024-a zawh tura ruahman a ni.