Northeast Frontier Railway (NFR) chuan sakhaw kutpui chhunga mipui tan zin veivahna a awlsam zawk nan a bika tlantir rel 10 a siam hnuah a dang pahnih a belh leh.
NFR rel thar hi kar tin an tlan ang a, November 28 thleng tlan tura ruahman a nih tih Chief Public Relations Officer (CPRO), Subhanan Chanda chuan a sawi.
Special train-te hi Katihar leh Delhi inkara tlan tur leh Agartala leh Habibganj inkara tlan turte an ni.
Delhi-Katihar Special Train hi nimin khan tlan tanin chawhma dar 11:00-ah Delhi chhuahsanin zan dar 10:00 khan Katihar a thleng.
Katihar atang hian Inrinni tin chhun dar 11.50-ah chhuakin Delhi chu a tuk zan dar 10.50-ah a thleng veleh thung dawn a ni.
Habibganj-Agartala Special Train hi Nilaini apianga Habibganj atanga tlai dar 5:00-a chhuak tur a ni a, kar leh Nilaini atang a tlan tan dawn a. Agartala hi Zirtawpni zan dar 9.30-ah a thleng ang.
Agartala atang hian Inrinni tin chawhnu dar 2:00-ah a chhuak ang a, Thawhtanni tlai dar 5:10-ah Habibganj thleng tura tih a ni bawk.
Rel hian Naugachia, Khagaria, Begu Sarai, Barauni, Hajipur leh Patliputra a paltlang ang.
Indian Railways hian a hmain sakhaw hunpui chhungin rel haw lam leh kal lam 196 zet chu Thawhlehni khan a lo tlan tantir tawh a, hei hi November 30 thleng tur a ni.
CRPO chuan a bika tlantir relah hian reserved coach a awm lo vek tih a sawi a. A chuang turte chuan Aarogya Setu App hmangin COVID-19 laka himna dan an zawm a ngai bawk.