West Ham United chuan tun nipuia striker an dap kual hnuah an mi duh an hmu dawn a, Italian striker Gianluca Scamacca lalut turin inremna an nei.
Serie A club Sassuolo nen inbiakna an neih hnuah Pound maktaduai 30.5 in an inrem a, tun nipui a player an lakluh palina a ni ang.
Kum 23 mi Italy international hi contract ziahpui erawh an la mamawh a. Nimahsela harsatna awm lo tura ngaih a ni.
Hammers hian tun nipuiah tlarhmaah rinrawl tur striker an dap a, Chelsea atangin season liamta a loan a Southampton tana che tha Armando Broja chu ngaihven mahse an inbiakna a kaltluan loh hnuah Scamacca lam an hawi.Tunge Scamacca?
Rome a piang feet 6 leh inches 5 a sang Scamacca hi Lazio leh AS Roma youth team a inzir a ni a, kum 16 a nihin Dutch club PSV chuan an lalut a, mahse first team tan an khelhtir hman lo.
Kum 2017 khan Sassuolo in an ramah an la kir a, loan in season li chhung Serie B, Eredivisie leh Serie A-ah te inchherhriam turin an chhuahtir a, hetih chhung hian goal 42 a khung.
Tun season liamta khan Sassuolo in an tlarhma a rinrawlah an hmang a, match 36 atangin goal 16 a khung.
Striker palian a ni chungin a ball khawih in fak a hlawh thin a, penalty area chhungah a hlauhawm a, ball pet a thiam avangin a ‘shooting’ a hlauhawm tih a ni thin.
Nikum September thla khan ram tan a inkhel tan a, Italy tan vawi 7 khelhtir a ni tawh.
Hammers hi a zawm fel chuan Nayef Aguerd, Alphonse Areola leh Flynn Downes te tun nipuiah a zui lut dawn tihna a ni.