Mizorama rel ticket lakna, Department of Transport hnuaia Railway Out Agency (ROA)-in kum nga leh thla thum chhungin rel ticket mi 1,02,633 hnenah an pe chhuak a, chawhrualin thla khatah mi 1,629-in zin nan rel an hmang thin a; Mizoram mipuiin state pawn zin nan rel chu hman rim berah an hmang lo tih a lang.
Transport office-a Railway ticket booking counter enkawltuten The Zozam Times an hrilh danin kum 2017 khan Mizoram atanga state pawna rel hmanga zin mi 31,397 an awm a, a kum leh 2018-ah rel passenger mi 31,573 an awm leh.
Rel hmanga state pawna zin hi a kum telin an tlem zel tih ticket an pek chhuah atang hian a lang a, 2017 leh 2018-ah rel hmanga zin 30,000 chuang an awm laiin, kum 2019-ah chuan 30,000 hnuaiah tlain, mi 28,967-in zin nan rel an hmang.
Kum 2020-ah phei chuan Covid-19 leng avanga mipui khuakhirhna kalpuia inzinpawhte khap a nih avangin rel hmanga zin an tlem leh zual a, passenger 5,240 chauh an awmin, kum liam ta, 2021-ah pawh rel hmang hi 3,404 an awm.
Kumin January atanga March, thla thum chhungin state pawna rel hmanga zin, ROA-a ticket la chu mi 2,052 an awm tawh bawk a ni.
ROA-in an chhinchhiah danin kum 2017 atanga kumin March thla thlenga rel hmanga zin zawng zawng chu mi 102,633 an ni a, rel ticket hralhna atanga sum an hmuh chu Rs 46,494,430 a ni a; chumi atanga transport department-in hlep a neih chu Rs 6,52,755 a ni.
Chawh ruala lakin thla khat chhungin rel hmanga zin chu mi 1,629 awm ziah ang an ni a, chung atanga thla khata sum an lak luh chu Rs 7,45,229 vel ni thina chhut a ni.
Transport department hotute chuan tun dinhmunah chuan mipuiin rel hman tangkai nachang an la hre tawk lo tih an sawi a, Sairangah rel a luh hunah erawh zin veivak an pun zual erawh an beisei tih sawiin, tunah erawh rel station awmna chu ram mipui huap tan hman tangkaite pawh a la har rih deuh nia a lan thu an sawi.
Rel chuan man chu lirthei nen khaikhinin a tlawm hle tih an sawiin, kum upa, zirlai leh damlote tan ticket manah ngaihhnathiamna a awm thu leh hei hi mipuiin hria se an duh tih an sawi.
Transport department hotute chuan rel hmanga zin zinga a tam berin Gauhati leh Delhi inkar kal nan an hmang a, Silchar atanga hmun dang pan tura ticket late pawh an awm nual thu te, Bairabi rel station bik erawh a hmunah ticket counter a awm avangin ROA atanga ticket lei, Bairabi atanga state dang pan erawh an awm ngai lo tih an sawi a ni.
Railway Out Agency, Aizawl hi kum 1975 November 14-ah ding tanin, khatih hun lai khan Mizoram hian Guwahati atanga rel chhuakah emergency quota tlem tê chauh neiin, manual booking-in ticket pe chhuak thinin, Silchar emaw, Guwahati emaw station hmunah ticket chu lei chawp a ngai thin.
Kum 1997, May 22 atang khan Computerized Ticket Booking hawng tanin, Aizawl atang hian India ram hmun hrang hrang, relin a tlawhpawhna zawng zawng (broad gauge)-ah chuan ticket hi duh zat zat, eng class-ah pawh a pe chhuak thei ta vek a ni.