Aizawl: Chawnpui Congress Unit 1 & 2-in Aizawl Municipal Corporation (AMC) dan dinglai bawhchhiaa Chawnpui Local Council-in hnatlang thawk thei lote hnenah sum an phutah puhin, nimin khan AMC commissioner hnenah complaint an theh lut.
Complaint an thehluhah hian Chawnpui LC hian June 11 leh June 25, 2022 khan veng chhung hnatlang an ko a, hnatlanga thawk chhuak thei lo tan phatna, chhungkaw khat tan Rs 200 leh hnatlang thawk chhuah thei lote rûnna Rs 500 an phut chu AMC dan dinglai, The Mizoram Municipalities (Ward Committee leh Local Council) Rules, 2010 bawhchhiatna leh hre reng chunga palzutna a nih thu an sawi.
Chawnpui Congress Unit 1 & 2-te hian AMC dan dinglai ang chuan local council-te hian hnatlang phatna, chhungkaw khat atan Rs 100 leh runna Rs 200 aia tam hnatlanga thawk thei lote lakah an phut thiang lo niin an sawi a. Kum hnih chhung hripui leng avangin chhungkaw tam takin eizawnna kawngah harsatna tawkin, nunphung pangngaia bul tan an tum mek laia Chawnpui Local Council-in danin thuneihna a pek piah lama mipui hnena atanga pawisa an la hi mi retheite rawkna leh nekchepna a nih avangin, hetiang hi thleng nawn tawh lo se an duh tih an sawi.
A tul anga hma la turin AMC Commissioner hnenah an thlen a ni.