- Ruata
South Korea company lar Kia chuan tunlaia India rama an midsize SUV hralh kal tak, Mizoramah pawh kan hmuh ve nual tak Seltos chu a hmelthar model South Korea market-ah an tichhuak leh ta a, India ramah pawh kan hmuh thuai beisei a ni a. Report thenkhat chuan August thlaah hian an tlangzarh ve nghal maithei niin an tarlang bawk a ni.
Kia Seltos hi South Korea company vek Hyundai ho midsize SUV Creta nena kawng tam taka inanna nei a ni a. Kia leh Hyundai te hian an lirthei khawl leh platform bakah thil hrang hrang intawmin heng SUV pahnihte hi an duang a. Kia Seltos leh Hyundai Creta in thil hrang hrang an intawm ang bawk hian an sub compact SUV Kia Sonet leh Hyundai Venue te pawhin lirthei siamphungah intawm tam tak an nei bawk a ni.
India rama kan hmuh tur Kia Seltos hmel thar model hi South Korea-a an tlangzarh nena khaikhin chuan a inang chiah chiah dawn lo a. Seltos thar tur hi a lirthei rawng leh design thenkhatah tlem a danglam chauh ang a, a khawl pawh hi a ngai a la ring zui dawn a. Hetihrual hian a kentel hmanraw thenkhat dah belh an neih hmel bawk a ni. Hmelthar, facelift kan tih hi a tlangpuiin company hrang hrangah pawh lirthei model thar hlak leh design thar hlak a ni ngai lemlo a, a a leitute rilru ti thar tura a rawng leh an chei dan thenkhatah te, a kentel hmanraw changkang leh adangah te, an lirthei chhuak mek han tuaitharlehna a ni tlangpui thin a ni.
2022 Kia Seltos facelift model-ah hian a hma grill fual hret, twin headlamp cluster leh LED DRL awm tel kan hmu dawn a. Hei bakah hian a hma bumper khawih danglam hret leh faux skid plate thar kan hmu dawn a ni. Alloy wheel design thar a nei ang a, a hnunglamah pawh bumper a hmaa mi nena khaikhina danglam hret leh taillamp thar te a nei dawn bawk a ni. India rama chhuak tur hi South Korea-a an tihchhuah aiin a lirthei lenzawng tehna hrang hrangah a te hret ang a, a san zawng bikah a sang hret dawn a ni.
A chhungah hian all-black & caramel interior theme kan hmu dawn a, Seltos variant pakhat Gravity-ah chuan a chhungah hian midnight green scheme a awm dawn bawk a. South Korea rama an tlangzarh tak hian ADAS (advanced driver assistance system), upholstery rawng thar, fully digital instrument cluster, leh updated UVO connected car tech te a nei a. India rama chhuak turin a neih chin tur hi chu company lamin an rawn la puang chiang thuai turah te pawh beisei ila.
India rama Kia Seltos hmel thar lo chhuak tur hian panoramic sunroof bakah airbag 6 a rawn neih tawh hmel a. Airbag a neih zat tur bik hi India ram sorkarin lirthei mi 8 leh a hnuailam chuan theihna chhuak thar reng renga awm tura a phut a ni a, hei hi India rama a rawn chhuah hunah chuan a rawn neih ngei tur thil a ni dawn a ni.
A khawl lamah hian Kia Seltos facelift hian tuna chhuak mek, 14bhp power pechhuak thei 1.5L naturally aspirated petrol, 138bhp power pechhuak thei 1.4L turbo petrol leh 114bhp power pechhuak thei 1.5L turbo diesel khawl te a la neih chhunzawm zel dawn a ni.
Kia Seltos hmelthar chungchang hi India ramah chuan company lamin thawm an la nei hran lo a. Hetihrual hian lirthei lam kaihhnawih media hrang hrangin thawm an nei tan tawh a. Tuna Kia Seltos chhuak mek mawi leh tha tak mai hi hmelthar nen kan hmu thuai turah beisei ila, design mawi lehzual leh kentel hrang hrang tha lehzual te nen Kia Seltos hi India ramah reiloteah kan hmu thuai dawn niin a lang a ni.