Aizawl : Larsap Hari Babu Kambhampati-a’n nimin khan Director, Indian Institute of Technology(IIT) Tirupati Prof K.N. Satyanarayana leh Prof S.Sundar, Director, NIT Mizoram te Raj Bhavan-ah kawmin, leimin vanga harsatna thleng thin pumpelh chungchangte, science thiamna hmanga Mizorama kuthnathawktute hmalakna tanpuina chungchangte leh NIT Mizoram sak hna thawh dan tur te a sawipui.
Larsap chuan NIT Mizoramin zirlaite hmakhawngaia zirna in tha tak taka mithiamte a thawhpui thin lawmawm a tih thu a sawi a. NIT Mizoramin campus leh building te an neih hma chuan hetianga mithiamte thawhpui hi a la tul rih dawn tih sawiin, thawhhona hrim hrimah thil thar tha zawk leh hmasawnna thar a lo awm thin tih a sawi.
NIT Mizoram chu a awmna rei tawh mahse, a sakna tur ram chungchangah tihfel ngai te tihfel chhung a rei ta deuh nia sawiin, Larsap chuan "Tunah erawh chuan chinfel ngai te pawh NIT Mizoram leh Mizoram sorkar thawhrimna zarah a fel thawkhat tawh a, a lawmawm hle a ni" a ti.
Technology Innovation Hub in Positioning leh Precision Technologies, IIT Tirupati leh NIT Mizoram ten leimin leh a vendan satellite hnathawh chhawr tangkaia zirchianna an buatsaih chu Mizoram tana thil pawimawh em em a nih thu Larsap chuan a sawi a. ni 5 chhunga zirchianna chuan DM&R leh hetiang lamah sorkar hnathawk mawhphur tute zawng zawng thiamna tangkai tak a pek belh ngei a beisei thu a sawi bawk.