Congress MP palite chu rorelna in chhunga thil man sang duh lohna lantirna lehkha ziak an ken luh avangin tuna parliament fur thutkhawm kal mek, August 12 thleng awh turah tel ve thei tawh lo tura hrem an ni.
Speaker Om Birla chuan MP-te hi lungawi lohna an lantir a nih pawhin an thuziak kente chu rorelna ina keng lut lova a pawna ti mai turin a lo hrilh tawh a, an zawm loh avangin an chungah hremna a lek ta a ni.
Congress MP hremte hi Manickam Tagore, Jothimani, Ramya Haridas leh TN Prathapan te an ni.
Speaker-in a suspend hnuah hian MP-te hi parliament tuala Mahatma Gandhi lim hmaah dingin duh lohna thu an aupui zui a. Congress chuan sorkarin an MP thenkhat hrema rorelna an aw tihnepsak a tum niin an puh a. “Kan MP-te hian mipuite nghawng thil au chhuahpui an tum mai a ni,” tiin an sawi.
“MP-te hian thuziak kengin gas cylinder man to, buh dip leh buttermilk-a GST lak an duh lohna an lantir a. Heng thil sawiho hi kan phut a; mahse, sawihona hun pek kan ni lo,” tiin Lok Sabha-a Congress Deputy Leader Gaurav Gogoi chuan a sawi.
Lok Sabha speaker hian eptu MP-te hi an thil sawi duhte chawhnu dar 3:00 hnu lama sawihona hun a awm tur thu a hrilh a, placard erawh rorelna ina keng tawh lo turin a ti.
“Placard in pho lang duh a nih chuan pawn lamah ti rawh u. Sawiho turin ka inpeih a; mahse, ka dawh theihna hi ka chak lohnaah min ngaihsak suh u,” tiin a vaukhan a ni.
Hemu hnuah hian minute 20 an nei a, tlai dar 3:00 hnua an luh lehah pawh eptu MP-te hian placard an la keng lui zel a. Speaker hian rorelna chu naktuka chhunzawm turin a titawp a, MP palite chu hrem an ni zui ta bawk a ni.