Mipui rorelna a awm theih nana beitu (democracy activist) pali chu Myanmar-a sipaiten an tihlum a, kum tam tak chhunga he rama mi tihhlum a nih leh hmasak berna nia hriat a ni.
Mi pali zingah hian activist Ko Jimmy leh MP Phyo Zeya Thaw te pawh an tel a, ‘firfiakin an che’ nia puh an ni.
Tu dang mah an tel ve theih lohna court rorelnaah thiam loh chantira tihhlum tura tih an ni a, mihring dikna chanvo humhalhtute chuan rorel dan a lai lo hle tiin an sawisel.
Thawhtanni khan tihhlum tak chhungte hi Insein tan inah pung khawmin an chhungte chanchin hrilh tura phutna an lantir.
Zayar Thaw-a nu chuan a fapa hi engtika tihhlum nge a nih tih pawh hrilh a ni lo tih a sawi a, tih dan phung pangngai anga vuina buatsaih pawh a thei lo niin a sawi.
“Zirtawpnia Zoom-a kan inbiak chuan ka fapa hi a hriselin a nui a. Lehkha chhiarna tarmit, dictionary leh pawisa tlem azawng thawn turin min ti a, vawiin khan tan ina pek turin ka leisak,” tiin Khin Win May-i chuan BBC Burmese Service hnenah a sawi a. “An thah chhan tur ka hre lo va, ka awih thei lo bawk a ni,” a ti.
A hming tak Kyaw Min Yu, Ko Jimmy tia an sawi mai farnu pawhin a nutapa ruang an la hmu lo tih a sawi bawk.
An chhungte hian heng mite tihhlum an nih dan leh an chanchin kimchang hrilh tura ngenna an thehlut tawh.
Sorkar chanchinthar puangtu, Global News Light of Myanmar chuan heng mi palite hi ‘mi an phiar a, mihring tih dan phung lo takin an che a, chutiang tur chuan mi an hruaiin tih dan tur an ruahman’ avangin tihhlum an ni tih a tar lang.
Counter terrorism law hmanga thiam loh chantir an ni tih tar lan a ni a; mahse, engtik hunah nge, engtin nge tihhlum an nih tih erawh engmah a tar lang lo.
United Nations-in a chhinchhiah dan chuan tun tuma mi tihhlum hi kum 1988 hnua a vawi khatna a ni a. A hmaa tihhlumte chu khai hlum an ni thin.
Kum 2021-a sipaiten thuneihna changa mipui sorkar an hnehchhuh hnuah ram pumah duh lohna lantir a ni a. Anmahni duh lotute hi sipaite chuan tharuma chhang letin activist leh chanchinbumi eng emaw zat an man a ni.
Myanmar-ah hian inthlanpuiah Aung Suu Kyi-i kaihhruai party-in hnehna an chan hnuah vote tihchingpen a awm nia puhin thuneihna an chhuh a, election commission chuan sipaite puhna hi a dik loh thu an sawi a, chhuitu dangte pawhin a nih loh thu an sawi bawk.
Sipai thuneihna an chan hnuah hian Suu Kyi-i chu pawn chhuak thei lova hren a ni a, thubuai hrang hrang siamsak niin thiam loh a chan vek chuan kum 150 chuang lung in tang tura hrem theih a ni.
Assistance Association for Political Prisoners (AAPP) chuan sipai duh lohna lantirtute laka sipaite chetna avanga thi, lung ina khung leh hren an pung zel tih an sawi a. Mi 14,847 man ni tawhin mi 2,114 vel an thi tawh niin an tar lang.Activist Tihhlumte
Kum 53 mi, Ko Jimmy-a hi 88 Generation Students Group an tih, Burmese pro-democracy movement-a tel tawh kha niin hei hi an rama sipai rorelna a awm hmasak hun laia mipui rorelna a awm theih nana zirlaiten sipai duh lohna an lantirna kha a ni.
A nupui, activist Nilar Thein-i nen mipui rorelna a awm theih nana nawrna bul tantu zinga tel an ni.
Kum 2007-a puithiamten sipai rorelna duh lohna an lantir chiam tum pawh khan an nupa hian kum 1988-a telte kha khawmin an tawiawm.
Vawi tam sipaiten manin lung in pawh a tang nual a, kum 2012 khan chhuah a ni.
Nikum October khan man leh a ni a, Yangon-a apartment-ah ralthuam tam tak a thukru nia puh a nih bakah sipaiten thuneihna an chan leh hnuah mipuiin sorkar an din, National Unity Government-a advisor nia puh a ni.Kum 41 mi, Phyo Zeya Thaw-a hi hip-hop star thin, NLD hminga MP ni zui ta a ni ve thung.
An band, Acid chuan Myanmar-a hip-hop album hmasa ber tichhuakin an hla thute chuan sipai rorelna a sel nasain an bei nasa hle.
Mipui rorelna a awm theih nana bei nasa ber, Aung San Suu Kyi-i nen inhnimhnai tial tialin ram dang hruaitute nena an inkawma zin chhuahnaah pawh a zui fo thin.
November thla khan firfiaka chetnaah a inhnamhnawih nia puha man a ni.
Phyo Zeya Thaw leh Ko Jimmy te hian June thla khan hremna an pek khing let mah se an hneh lo ve ve.Hla Myo Aung leh Aung Thura Zaw te pahnih erawh hriat an hlawh tam lo. Hmeichhia, sipai thuneitute hnena thil hrilh thin an thata puh an nih avanga hrem an ni.