Chawlhkar 20 zet i rai tawh a, thawklehkhatah naupaiina a chhawmtel hrang hrangte a bo nghal duak a, thi pawh chhuak tawh lo dinhmunah i ding ta tlat mai. A ngaihna hre lovin a ruktein mang-anna chuan a bawm nghal che a. I buai ta! Engpawhnise, hei hian a entir chu- ‘missed pregnancy’ an tih mai, rai ve uk si, harsatna vanga tlawlh leh ta a entir.
Missed Pregnancy an tih fo hi…
Sawi tawh angin, naupai tanna a awm ngei a, mahse chhan engemaw vanga hmasawnna awm lova tawp leh ta thut sawina a ni a. Hei hi a tlangpuiin naupai atanga thla thumnaah hian a thleng thin a ni.
A tlangpuiin, chhul-a awm naute insiam tura kha lungphu siam thei lova a tawp ta a nih chuan missed pregnancy a awm ta tih a hriat theih a, a chhan chu naute lungphu hi rai atanga chawlhkar 6 na vela a insiam tan thin vang a ni.
Chawlhkar ruknaa naute lungphu a that loh chuan doctor chuan kar khat liam hnu-ah emaw a ni 10-na velah a enfiah ngei a rin-awm a, heti chung pawha lungphu a mumal loh viau chuan thil dik lo a thleng ta nge nge tihna a ni thei.
Engvanga lo thleng nge?
Inthlahchhawnna lama thil fel lo emaw chromosomal fuh tawk loh vangtein he harsatna hi a thleng thei a, he thil pahnih hi a kaikuang ber pawh an ni.
Progestrone level hniam tak i neihin emaw eng-emaw vanga inenkawlna i laka, engemaw vang bawka tih tawp leh thut a nih vangtein he harsatna hi a thleng thei.
Tin, chhul chian loh vangte (Chhul a tet viauin naute tan than ngaihna a awm thin lo).
Hei mai bakah chhul-a awm naute chawmtu amniotic fluid khawp kham loh vangte pawha thleng thei a ni bawk.
Ka rai leh thei tho ang em?
Hei hi chu i harsatna tawh dan a zir a ni ang. Nau vawi khat paina hi nauchhiat theihna hun awlsam ber a ni lehnghal a, i harsatna tawh dan kha ngun taka zirchian a nih hnuin a enkawl dan pawh a awm thei a.
Chumi hnu-ah chuan naupai lehtheihna kawng pawh engemaw chen chu a inhawng zau leh thei dawn tihna a ni.
Hei hi hria ang che
Naupaiina a chhawm tel insawiselna hrang hrang hi enfiah reng a pawimawh a, thawklehkhata luak chhuak ang chi te hi thlahnih chhunga a reh duakin emaw chawei tui lohna ang chite pawh chhan hriat lohva tui taka i ei leh theih nghal mai chuan ngaihven nghal vat tur a ni a, hnute nem em em thin kha a awm tawh loh chuan a rang lama doctor pan nghal tur.