Aizawl: Chief Minister Zoramthanga chuan Serchhip District Hospital hmunhma leh PWD office complex a tlawh a, Serchhip damdawi in lian sak bul tanna tur Rs baibelchhe 13 pek chhuah nghal a ni dawn tih a sawi.
Zorama hian Serchhip Damdawi In lian sakna tur hmun P&E ram, Bukpuia mi chu a tlawh a, bul tanna tur atana health department-in sum an dil, Rs vaibelchhe 13 chu pek chhuah a nih tur thu sawiin, hei hi damdawi in thar sakna tur panna kawng leh thawktute chenna sakna tur a nih thu a sawi.
Power Grid Corporation of India Limited chuan CSR atangin damdawi in sakna tur hi Rs. vaibelchhe 21 an rawn tum dawn a, hei hi February thla khan an rawn tichiang tawh a ni.
Hemi hnua Serchhip Auditorium-a vantlang hmaa damdawi in lian sak bul tanna tur sum an pek tur thu hi sawiin, “Serchhip khawpuiin an mamawh chuan tiin health minister hoin hma kan la nghal a, a bul tan nan SASCI sum atangin Serchhip mipui kan rawn duhsak che u a ni,” a ti.
Serchhip Bazar zauh tura ngenna bawhzuiin chief minister chuan bazar bula PWD SDO quarter, bazar zauhna tura beisei chu enho a ni.
Hemi chungchang valtlang inkhawmah chuan sawi leh bawkin, “Serchhip mipui mamawhna hriain, Bazarpui zauhna tur leh lirthei park-na turin a sira PWD SDO Quarters hmun zawl leh PWD kudam zawng zawng sawn pheina tur PWD EE Complex-ah ka en a, ruahmanna siam a ni,” a ti.
PWD Complex, New Serchhip-ah SDO Quarters leh thawktu dang quarters tur sak thar a ni dawn tih sawiin, Estimate siam turin Department lamte pawh hrilh nghal a nih thu a sawi bawk.