Tunhnaia Chhimphei tlângdung, Hualngohmun dâia MVI lamina Lirthei an check dan chungchangah Chhimphei lama chêngte dinhmun leh harsatna hriatthiam puina awm lo taka hmalâkna awmin ka hmu a. Hemi chungchangah hian kan sorkarin mipuite dinhmun diktak hre chunga hma la zâwk tûrin ka han ngên hmasa duh a. Hetiang hi thil awmdân/thlen dan tlangpui chu a ni.
Chhimphei tlângdunga kawngpui tan tlang khaw hrang hrangte Lirthei veivâk thinte chu tunlai hian MVI lamin lo check thinin, an document felfâi tâwk lo te, ‘high security Number plate’ chungchâng avângtea man thin kan ni fo a. Thingtlâng atanga ‘High security Number plate’ pawh phak ang tawka buaipuiin, a buaipuitu lam inpeih pawh nghâk hman lo a, a lirthei neituin a tûla kan lo hman lailâwk tum a nei fo thin a. Lirthei documents pawh felfâi taka kawl tûrin phâk tâwkah kan buaipui thin. A khawihtute indaih tâwk loh avang tea a hun taka min pêk chhuah hman loh tum pawh a awm ve bawk thin a ni. Tin, Sorkar dân leh hrai hi kan zâwm tur ani nameuh mai a, kan pawm bawk a ni. Hetih rual hian, kan khawpui ber Aizawlah motor dahna garrage mumal neilo reng chunga vawiin thlenga lirthei register la pung reng te, dân leh hrai sorkar in a zam ang zâwm ziktlûak si lo a kan lirthei sâng têl an chêt suau suau laia keini thingtlânga hnathawh nana kan lirthei kawng hrang hranga lo hmanga, neih thinglung khâwnga kan neih ve te engemaw fel fâi tâwk lo awm palh zauh avanga te a min check a, min man mai thin te, Thingtlang Kuthnathawk tu te’n an thlai thar khawpui lamah hralh turin Maxicab – ah te an rawn hlang a, hemi vang hian Maxicab – a phurtu te over load tia chhuanlam siamin an man bawk a ni. Hemi avanga hnathawh nâna kan lirthei kawl chhun ang pawh chelek tha ngam lo a kan awm ta mêk leh in hriatthiamna leh in ngaihhnathiamna awm miah lo a kan sorkar lam mite an che mêk hi pawi ka tiin, ka Chhimphei unâute pawh ka lainat hle a ni.
Kan khawpui berah pawh mumal taka inching fel hlei thei si lo hian thingtlâng zawkte lakah fîr taka chet min lâksak chhunzawm tawh lo turin kan sorkar thuneitu ka ngên tak meuh a ni.
Chhimphei tlângdung aiawhin,
- RB. Lalmalsâwma,
Phûlpui