Chakma Autonomous District Council (CADC) sorkar sum hman dik loh thubuaiah Tuichawng MLA Dr BD Chakma, Chief Executive Member ni mek, MDC pali leh MDC hlui pasarihte chu kum khat lungin tang tur leh Rs 10,000 chawi turin an chung thu a rel.
Court of Special Judge Vanlalenmawia chuan CADC sorkar sum hman dik loh thubuaiah kum 2013-14 chhoa CADC-a CEM leh MDC-te chu thiam loh a chantir a, kar kalta Zirtawpni khan court thu remna hi a lo puang tawh.
Nimin khan mi 13-te hremna tur hi puang lehin, kum khat chhung lungin tang tur leh Rs 10,000 chawi turin an chung thu a rel a. Sum chawi tur hi an pe thei lo a nih chuan ni 30 chhung lungin an tan a ngai dawn a ni.
Thiam loh chantirte hi court sang zawkah zualkona hun siamsak an ni a, bail bond Rs. 20,000 an pek hnuah bail-a chhuahtir nghal vek an ni.
Court thuremnain a tar lan danin kum 2013 leh 2014 chho khan sorkar laipui atanga CADC hmasawnna hnathawh tur sum lo kal, Rs 1,37,10,147 chu CEM hlui leh MDC, an vaia mi 13-te hian hlawh atan an insem a, thubuai chhui a nih laiin an sum hman hi rulhtir vek an ni tawh.
Hetihlai hian Autonomous District Council danah chuan development sum pawt peng turin larsap hnenah phalna lak a ngai a, sum hi rul vek tawh mah se, phalna la loa dan kalha an chet avangin thiam loh chantir an ni.
Special Court, PC Act-in kum khat lungin tang tur leh Rs 10,000 chawi tura an chung thu a relsakte hi - khatihlaia CADC-a CEM, tuna BJP MLA BD Chakma, tuna CADC-a MNF sorkara Chief Executive Member ni lai mek, Buddha Lila Chakma; district council-a member ni lai pali - Ajoy Kumar Chakma, Buban Kumar Chakma, Mohan Chakma leh Amit Kumar Chakma te an ni a.
Anni bakah hian MDC hlui - Amar Smriti Chakma, Adikanta Tongchangya, Parimal Chakma, Susen Chakma, Taranisen Chakma, Sushil Kumar Chakma leh Chitra Kumar Chakma te an ni.