Aizawl: Zoram People’s Movemment (ZPM) Consultant F Rodingliana chuan Zoram mipuite innghah ngamna tur leh beiseina thar an neih chhun tibeidawng lo turin ZPM a insiam rem a, a ding nghet tawk tih a sawi.
Nimina ZPM pisaa chhung inkhawmah thu sawiin ZPM consultant hian ZPM thuneitu sang, PAC-in ngun taka a ngaihtuahin Zoram mipuite innghahna tur zawng mekte tan an beiseina thar neih chhun tibeidawng lo tur leh, rahbi thar rap turin an insiam rem mek tih sawiin, “President atanga member tinte paih ngai kan nei a nih chuan paih a, kan thlauh tawh chhar ngai a awm a nih chuan ram hmangaih vangin huaisen taka chhar turin kan infuih thar a ni,” a ti.
F Rodingliana hian ZPM ‘Kalphung Thar’ chu party dangte anga mi sulhnu chhuia an chhiatna laite umzuia den zui lam ni loin, mipuiin beiseina an neihte tihlawhtling tura ke pen a nih thu a sawi a. Zoram mipui, kohhran leh khawtlanga mi tangkai tam tak hruai khat vuana huaisen taka ZPM tha tichak tur leh, kum 2023-ah suangtuahna khawvel atanga ding chhuaka Pathian lalna ram din tura tangrual turin a sawm tih a sawi.
ZPM consultant hian, “Kan ram hruaituten lalna leh thuneihna chauh an thlir avangin nun hi lemchannaa ngaiin phut let nei rânin hmangaihna leh khawngaihna thu a derin kan inhlan a, mahni hlawkna tur leh party hamthatna tur a nih chuan a lian a tein, thiang leh thiang lo pawh thliar loin hma an la a ni,” tiin, ZPM pawh hun kal tawha inen letna tur an nei a nih a, ram siam that duhna thinlung aia party an dah lian tawh a nih chuan, thinlung thar pu turin party mite a sawm tih a sawi bawk.