Rajya Sabha-a eptu MP 19-te chu rorel inkhawm kal lai an tihbuai avangin Thawhlehni khan tun kar chhung inkhawma tel thei lo tura hrem (suspend) an ni.
“Rajya Sabha-a eptu MP-te hremna hi dawhtheihna nena tih a ni a. Chairman-in a ngenna engah mah an ngai lo a ni,” tiin BJP hruaitu, Piyush Goyal chuan a sawi.
“Sorkar hian Finance Minister Nirmala Sitharaman a dama parliament-a a lo inlan leh theih hunah thil man sang sawiho hi kan inpeih reng a ni,” tiin Rajya Sabha-a leader, Goyal chuan a sawi bawk.
Thawhtanni khan Lok Sabha-a Congress MP palite chu rorelna in sang zawka thil sawiho phutna avang bawkin tuna fur thutkhawm kal mek chhung zawng atana tel thei lo tura hrem an lo ni tawh.
Rorelna inah hian heng MP-te hian an thil duh loh lantir nan lehkha ziak an keng lut a, Speaker Om Birla chuan ti tawh lo tur leh an ti duh a nih pawhin pawn lama ti tura a hrilhna pawh zah lova an tih zel avangin August 12 thleng nei tur rorel inkhawma tel thei tawh rih lo turin a hrem ta a ni.
Rajya Sabha-ah hian hremna pek MP-te hi hremna puan hnuah pawh chhuak duh lova a chhungah an thil phut an la lantir zui zel avangin inkhawm chu darkar khat lai tihtawp lailawk a ni.
Rajya Sabha MP 19-te hrem an ni leh ta hian eptuten an lo sawi chhuah fo tawh, sorkarin eptute a dim lohna leh vantlang leh ei leh bar thil an sawi ve tur reng reng an dangsak thin tia an puhna thawm chu a rin lehzual phah hle tura ngaih a ni.
“He sorkar hian mipui rorelna a hrem a ni,” tiin Trinamool Congress hruaitu, Derek O’Brien chuan thuthar lakhawmtute hnenah a sawi.
Rajya Sabha-ah hian eptu MP-te hian thil sawiho duh hrang hrang - thil man sang chak lutuk te, goods & services tax (GST) te, ni reilo te chhunga thil man a sang zung zung te leh a dang dang sawiho an phut a. An phutna an tihlannain rorel inkhawm pawh a tikhaihlak nual.
Eptute hian an thil phutte chu dan anga kal pawhin tihhlawhtlin an phut a. Rule 267 (Rules of Procedure & Conduct of Business in Rajya Sabha) hmangin sawiho ngei an duh a. He dan hnuaiah hian rorelna in chhunga thil eng emaw sawiho leh tih tura vawrh chhuah chu a nia sawiho leh tih a nih hman loh pawhin sawi tur leh tih tura hmachhawp (list)-ah telh tur a ni.
“Min suspend thei a; mahse, min ngawihtir thei lo. Tuna kan dinhmunah chuan kan MP zahawm tak takte hian ram mipuite kaihhnawih thil vawrh chhuah an tum a; mahse, hrem an ni hlauh si. Hetiang kalphung hian engchena rei nge kan kal dawn? Parliament thianghlimna hi nasa taka tihbawlhhlawh a ni ta,” tiin Trinamool Congress chuan Twitter-ah an tar lang a ni.Hrem tawk MP-te
Sushmita Dev (Trinamool Congress), Mausam Noor (Trinamool Congress), Shanta Chhetri (Trinamool Congress), Dola Sen (Trinamool Congress), Santanu Sen (Trinamool Congress), Abhi Ranjan Biswar (Trinamool Congress), Md. Nadimul Haque (Trinamool Congress), M Hamamed Abdulla (DMK), B Lingaiah Yadav (Telangana Rashtra Samithi – TRS), A.A. Rahim (CPI-M), Ravihandra Vaddiraju (TRS), S Kalyanasundaram (DMK), R Girranjan (DMK), NR Elango (DMK), V Sivadasan (CPI-M), M Shanmugam (DMK), Damodar Rao Divakonda (TRS), Sandosh Kumar P (CPI), Kanimozhi NVN Somu (DMK)