India sorkara mi thiam lu, NITI Aayog-a mi, Dr VK Paul chuan coronavirus beih let a nih hnuah ram chhunga damdawia inenkawlna chu a tha tih sawiin, “Monkeypox hlauhna awm mekah pawh chiai a tul lo,” a ti.
“A thlithlaina lam tihchak a ni a. Hetih rual hian mipui mawhphurhna pawh a awm a, a nat dan anga awm emaw, a hnaih deuh anga awm emaw chuan inhriattir vat tur a ni a. Inthup tur a ni lo va, inenkawl thuai tur a ni,” tiin Dr Paul hian news agency ANI hnenah a sawi.
“Damlo dangte pawhin natna dang an vei a, cancer hial pawh, chutiangte chu ngaihven ran a ngai zawk mah. Ka thuchah ber chu - chiai loh a ni a. He hri hi Covid anga darh chak a ni lo,” a ti a, hetih rual hian a veite hnaiha awmte chu khung hran an ngai tih hriat reng tur a nih thu a sawi bawk.
India-ah hian monkeypox vei hi mi pali an awm tawh a, pathum chu Kerala-a mi niin Delhi-ah pakhat a awm bawk a. Rinhlelh pahnih awm mekin Uttar Pradesh leh Hyderabad-a mi an ni.
Khawvel pumah erawh he hri hi ngaihven tak a ni mek a, kuminah mi 16,000 chuang a vei hmuh chhuah tawh niin a tam ber hi Europe-a mite an ni a. A vei tam ber hi mipa, an mipatpuite mutpui thinte an ni.
World Health Organization chuan monkeypox lakah hian Inrinni khan emergency a puang tawh a. Hetih lai hian WHO chief Dr Tedros Adhanom Ghebreyesus chuan he hri leng hi thunun theih a ni tih a sawi a. A kaite enhran lutuk chu a hri ang tluk zeta hlauhawm a nih zawk thu a sawi.
WHO bakah United States-a CDC leh EU hnuaia damdawi thuneitute chuan smallpox laka invenna vaccine-te chu hman atan a rawt a. France chuan vaccination centre 100 a hawng tawh.
Thawhtanni khan India-a health ministry thuneitute chuan smallpox vaccine hi monkeypox laka invenna atana hman turin ruahmanna a la awm lo tih an sawi thung.Monkeypox lan dan
Monkeypox natna hi tun laiah khawvelah natna buaipui thar a ni leh mek a. Tuna a vei hmuh tawh zinga a tam ber chu mawngkawhur an tih, mahni mipatpuite mutpui thin an ni.
A kaite hi sang takin an khua a sik a, an lu a na em em thin bawk a. An tihrawl leh hnung-zang a na em em a. Chil an ngah a, an khur nasa thin hle bawk a, an thlan a tla nasa thin hle.