Aizawl: Pachhunga University College, Aizawl chu India rama zirna inte endiktu, National Assessment & Accreditation Council (NAAC)-in Accreditation A+ Grade a pe a, Cumulative Grade Point Average (CGPA) 3.37 an hmu.
PUC hi tun thla ni 20 leh 21 khan NAAC chuan a endik a, tehfung hrang hrang hmanga endik a nih hnuah A+ grade pek an ni.
India hmarchhaka NAAC A+ college pahnih awmah PUC chu a score sang zawk niin, hmarchhaka college zinga NAAC grading-a score sang ber a ni.
Kum 2016-ah PUC hi A+ grade pek a ni tawh a, tun tumah A+ grade bawk pek leh niin, hma a sawn a, a hma aiin tun tumah point a hmu sang zawk.
Principal Prof. H. Lalthanzara chuan thawktute thawhhona a that vanga dinhmun sang luah theih an nih thu sawiin non-teaching staff, zirtirtu, zirlai, Alumni leh zirlai nu leh pate thahnemngai taka college hmasawnna tura an thawhho thin thu a sawi.