- Upa Lalthara, Kohima (9436001667)
- TUN LAIA ‘PIANG THAR’ KAN TIH HI CHU LAL ISUA LEH NIKODEMA INBIAKNA-A AN THIL SAWI NEN HI CHUAN THIL DANG DAIH A LO NI TA-IN A LANG.
6.1 A hmaa kan sawi tâk ang khân, tunlaia ‘piang thar’ tih emaw, ‘pian tharna’ tih emaw hi chu Presbyterian Kohhran kalhmang leh thurin nên pawh a inmil chiah lo va. Mizoram Baptist Kohhran erawh chuan tûn hnai deuh mai (1988) atang khân ‘thurin’ hi an lo nei ve tain, ‘pian tharna’ tih hi an Thurin no. 7-na ah heti hian an dah thung:
“Pian tharna: Pian tharna hi Thlarau Thianghlim hnathawh avanga lo awma ni. Mi piang thar chuan tun hma lama a la neih ngai loh, nihna thar leh thlarau lama nunna thar a lo nei ta a, Krista a thil siam thar a lo ni ta. A rilru put dân a lo thianghlim a, a duh zâwngte chu a lo danglam ta a. Sualin a chunga thu a neih thinna chu tih chhiat a ni a, sual ngainaa mahni inhmangaih thin chuan thianghlimna leh Pathian ngainatna a lo nei ta a. Chutiang danglamna chu chawp-leh-chilhin lo thleng a ni a, Chûng chu Pathian thil tih thihna hnathawh a ni. Felna rahah te, nun thara nunah te, hmuh theihin a lang chhuak thin. Pian tharna tel lo chuan chhandamna hi chan theih a ni lo. (Jn 3:3-7; 2 Kor 5:17; Eph 2: 8,9; Jak 1:18; 1 Pet 1:23)”.
6.2 Heta pian tharna awmzia an hrilh fiahna behchhan ni âwm, Bible châng an târ lan zinga pahnih, Johana 3:3-7, leh 1 Petera 1: 23 te hi chu ‘Chatuan nun nei tura Pathian hrin kan nihna’ sawina ni ngeiin a lang a, an sawina context en hian an sawi tum a inang chiah lo bawkin a lang. Pathian hrin ni tur chuan Lal Isua Krista rin hi a tâwk thu kan sawi tawh a; chu rinna chu kan naupan têt atanga kan neih leh kan than hnan theih a nih thu pawh kan la sawi zui ang.
6.3 An Bible châng târ lan dang: Jakoba 1:18 hi ringtute chu rah chhuah tura thu taka hrin kan nih thu sawina a ni a; 2 Kor 5:17-ah hian Krista-a awmte chu thil siam thar an nih thu a lang a; Ephesi 2:8,9-ah hian thil tih vang ni lova, khawngaihnaa chhandam kan nih thu a lang a.
6.4 Baptist Kohhran thurina ‘piang thar’ an sawi fiahnaa thil thenkhat: entir nan, ‘nihna thar leh thlarau lama nunna thar a lo nei ta a, Kristaa thil siam thar a lo ni ta’ tih te hi chu, ringtu/ Kristian la ni ve lote, Isua ringtu an lo nih tâk avanga ‘an nihna thar’ sawina ni zâwkin a lang a. Ram thar hmuna ‘ring thar’ kan neih thinte dinhmun thar ni zâwkin a lang. Mahse, hêng hote hi ‘piang thar’ ti lovin, ‘ring thar’ tiin kan la sawi zêl chu a nih si hi.
6.5 Tin, a dangte: ‘a rilru put dân a lo thianghlim a, a duh zâwngte chu a lo danglam ta a. Sualin a chunga thu a neih thinna chu tih chhiat a ni a, sual ngainaa mahni inhmangaih thin chuan thianghlimna leh Pathian ngainatna a lo nei ta a,” tih te hi chu ringtute’n puitlin lam kan panna kawnga kan than lenna tur, kan thil dawn tur leh, kan tawnhriat tura kan beiseite ni zâwkin a ngaih theih. Ringtute hi puitlin lam kawng pan zêl tur leh, kan chhandamna ti famkim tura bei zêl tur kan nih lam sawina niin a lang zâwk. (Heb 6:1; Phil 2:12). Tirhkoh Paulan “Naute u, Krista chu nangmahni-ah siam puitlina a awm hma loh chuan nau veiin ka vei leh che u a ni” (Gal 4:19) a lo tih ang khan. Tin, hêng thilte hi chu ‘chawp-leh-chilha’ thleng tur emaw, neih thut tur emaw an nih loh hmêl khawp mai a. Mahse Baptish Kohhran Thurinah hi chuan “Chutiang danglamnate chu chawp-leh-chilhin lo thleng a ni a” an ti leh bawk si a.
6.6 Baptist Kohhran thurin 7-na tlipna-a ‘Pian tharna tel lo chuan chhandamna hi chan theih a ni lo’ an tih pawh khi, a hma lama pian tharna an sawi fiahnate nêna lâk belhbawm dâwn chuan, nausên chu sawi loh, ringtu naupang zâwkte, ringtu zin kawng la zawh thui lo deuhte leh, khita ringtute than lenna tur thil an sawite la tem pha ve lote tân chuan chandamna hi beisei phâk a ni dâwn lo, tihna angin a ngaih theih ang. Lal Isuan, ‘Pathian ram chu hetiang mite tâ a ni si a’ (Luka 18:16) ti-a naupang tê tê te pawh chhandamna huang chhûnga a lo seng lût mai si nia langte leh, Filipi khaw tân in vengtu hnêna Paula leh Sila’n “Lalpa Isua ring la, tichuan, chhandamin i awm ang, nang leh i chhûngte nên,” (Tirh 16: 31) an tih te nên hi chuan, an thil thlir dân (approac & theology) chu a dang hle chuan a lang.
6.7 Chanchin Tha ziaktu Johana bawk hian chhandam nih theih dân kawng Lal Isua sawi ngei heti hian hmun dangah te pawh a lo ziak ngei a ni: “Tu pawh Fapa ring apiangin chatuan nunna a nei tawh…” (Jn 3:36) tih te, “Thu dik tak ka hrilh a che u, tu pawh ka thu hria a, mi tirtu ring chuan chatuan nun a nei tawh; thiam loh changin a awm lo vang a, thihna ata nunnaah a lût tawh zâwk a ni” (Jn 5:24), tih te, … “tu pawh a ring chuan chatuan nunna a nei tawh a ni,” (Jn 6:47). Hêngte hi a hmâa kan sawi tâk Lal Isua thu sawi (Jn 3:16) nên pawh an inmil chiah bawk a ni. Hêng Bible chângah te hian, Lal Isua ringtute chuan chatuan nunna an nei tawh a, chûng mite chu chung lam hrin/ Pathian hrin an lo ni ta bawk a ni, tih hi chiang takin kan hmu thei a ni.
6.8 Tin, Johanan he a Chanchin Tha Bu a ziah chhan bulpui ber nia a sawi leh, he Chanchin Tha Bu a tlipna nia lang hi lo en leh i la: “Tin, Isuan zirtirte hmâah chuan chhinchhiahna dang tam tak a ti teuh a, chûng chu he lehkhabuah hian ziah a ni lo; nimahsela, hêng hi Isua Krista, Pathian Fapa a ni tih in rinna tur leh, in rin a, a hminga nun in neihna turin ziah a ni,” (Jn 20:30-31) tiin a ziak. Tin, Johana lehkhathawn (1 Jn 5:13)-ah pawh “Chatuana nunna in nei tih in hriat theih nân nangni Pathain Fapa hming ringtute hnênah hêng thu hi ka ziak a ni,” tiin a lo ziak ngei bawk. Hêngah te pawh hian ‘Isua ringtute chu chatuan nun nei’ an nih thu hi uar takin an sawi a ni ber e.
6.9 Chanchin Tha Bu pali zingah Johana ziakah chiah hian ‘piang thar’ tih hi kan hmu a; hei pawh hi lehlin fuh loh vang maia (‘chung lam hrin’ ti lova) ‘piang thar’ tia dah a nih thu kan sawi tawh kha. A chunga Bible châng hrang hrang kan târ lan tâk atangte pawh khian ‘pianthar’ thu hi a lang lo va; chandamna changtu leh Pathian fa nihna kawng awm chhun chu Isua Krista rin hi a nihzia uar tak leh chiang taka sawina an ni ber zâwkin a lang. Chutianga Isua ringa, chatuan nunna neite chu ‘piang thar’ an nih thu sawina Bible-ah a awm lo.
(la chhunzawm tur)