India-a eptu hruaitu, Rahul Gandhi chu an party, Congress member-ten lungawi lohna an lantirna hmunah Thawhlehni khan police-in lain an hreng.
Sum kaihhnawih thubuaiah sorkar laipui hnuaia chhuituten an party president, Sonia Gandhi-i thu an zawh fiah duh loh lantir nan eptute hi khawpui ber, Delhi-ah an pungkhawm a ni.
Gandhi-i leh Rahul-a hian an party sum chu dik lo taka hmangin ram leh hmun hlu tak an chan theihna turin thil an tikual nia puh an ni.
Gandhi nufa hian an puhna hi an pha ve ve thung.
Sorkarna fawng chelhtu, BJP chuan sorkar laipui hnuaia dan kengkawhtute chu politics-a an laka phuba an lak nan hetiang hian an puh kual niin an sawi.
Thawhlehnia Gandhi-i thu zawh hi he thubuaia thu zawh vawi hnih a nihna a ni.
Police-in an lak hma hian Gandhi-a leh an party mite chu lungawi lohna lantir nan Delhi-a kawngpui lun laia an thu a, police thahnem takin an hual a. Thil man sang chak lutuk atanga sorkarin eptu hruaitute a bitum thin duh lohna an lantir a ni.
Darkar khat chuang mah hetianga an awm hnuah hian amah leh mi dang eng emaw zat chu bus-a phurha hren tura lak an ni ta a ni.
June thla khan Gandhi-a hi he thubuaiah tho hian Enforcement Directorate (ED)-in ni nga chhungin darkar 50 vel thu zawh a lo zawt tawh a. Gandhi-i pawh hi hetih lai hian thu zawh tura koh ve tho a ni a; mahse, Covid-19 a kai avangin a inlan thei lo.
Kum 75 mi Congress chief hi damdawi inah dah luh hial ngaiin a awm a, June thla tawp khan a chhuak a ni.
Tun hi sorkar laipui hnuaia dan kengkawhtuten Gandhi-i thu an zawhna hmasa ber a ni a. BJP hruaitute chuan Congress party hruaituten politics-a hamthatna lak nan sorkar laipui hnuaia awmte remchangah an hmang nia an puh chu nasa takin an pha.
Gandhi nufa laka thubuai hi BJP hruaitu, Subramanian Swamy-a’n court-a a thlen a ni a. An party sum chu tuna chanchinbu tihchhuah tawh loh, National Herald tichhuaktu firm lei nan an hmang niin a puh a ni.
National Herald chanchinbu hi kum 1938-a India prime minister hmasa ber leh Gandhi-a pu pa, Jawaharlal Nehru-a bul tan a ni.
Kum 1937-a din, Associated Journals Limited (AJL) leh zalenna sualtu mi 5,000 rualin inthuruala an tihchhuah thin a ni.
Kum 1947-a India-in zalenna a neih khan Nehru-a hi board chairman a nihna bânsanin prime minister thutthlengah a thutsan.
Nehru-a chawl mah se Congress party au chhuahna ber chanchinbu a ni zui a. Congress puihnaa ni tin chhuah a nih lai chuan India-a chanchinbumi hriat hlawh tak takte an thawk thin a ni.
Kum 2008 khan sum harsatna avangin a tawp lailawk a, kum 2016 khan digital-a tihchhuah leh tan niin Congress au chhuahna a la ni zel.
Swamy-a chuan Gandhi nufa hian Congress party sum chu chanchinbu tichhuaktu, AJL neiha khawpui lian hrang hranga an hmunhmate an neih theih nana hmangah a puh a. AJL hian Delhi leh Mumbai bakh khawpui dangah hmunhma Rs. vaibelchhe 20 chuang man a nei.
Party erawh chuan puhna hi nasa takin an phatpui a, ‘thubuai mak tak, pawisa tel miah lohva pawisa tihchingpen thubuai’ tiin an sawi.Buaina intan dan
National Herald chanchinbu thubuai, Gandhi nufa puhna hi kum 2012-a Swamy-a’n trial court-a a put luh atanga intan a ni.
Swamy-a hian Gandhi nufa hian AJL thununa an thil nen Rs. vainelchhe 20 chuang man hu an chan theih nan dik lo taka Congress party sum an hmang niin a puh.
Km 2008-a National Herald tihtawp a nih lailawk lai khan AJL hian Congress hnenah hian Rs. maktaduai 900 vel ba a neih chu a hlan.
Kum 2010 khan Congress hian heng leiba an neih takte hi Young India Private Limited an tih, hlawkna um lova company din thar pakhat hnenah a hlan chhawng a. He company-ah hian Sonia leh Rahul te hi board of director zingah telin chanpual pawh 38% ve ve an nei.
A bak chanpual dang, 24% chu Congress hruaitu, Motilal Vora leh Oscar Fernandes bakah chanchinbu mi, Suman Dubey leh entrepreneur Sam Pitroda ten an chang ve a, anniho pawh hi thubuaiah hian an hming a lang vek.
Swamy-a chuan Gandhi nufa hi thil hlu cheng maktaduai tam tak man hu chu an neih theih ngei nan kikawi kual talin thil an kalpui vel niin a puh.
Young India hian AJL leiba an laksak atang hian anmahni leh an hnuaia ram hmunhma leh in, Delhi, Lucknow, Mumbai leh khawpui lian dang danga awmte chu thunun theihna an nei vek niin BJP hruaitu hian a sawi bawk.