Aizawl: Animal Husbandry & Veterinary Minister Dr. K. Beichhua chuan nimin khan Tanhril leh Ramrikawna department ran chaw siamna hmun tlawhin, ar-ah intodelh tum a nih thu a sawi.
Zoram Poultry Development Society (ZPDS) hmunpui a tlawhnaah Dr K Beichhua hian, Mizoramin chawlhkar khatah ar note 60,000 a mamawh tih sawiin, “Tunah hian Mizoramin ar awpkeuna a neih that ber ZPDS hian chawlhkar khatah ar 20,000 an awpkeu theih thei a. Hei vang hian chawlhkar khata ar nuai khat awpkeu thei turin ZPDS hmunpui Tanhril chu thuam that tum mek a ni,” a ti.
AH&Vety minister hian ran chaw siam nan thla khatah vaimin quintal 700 vel an mamawh tih sawiin, an mamawh zat hi Mizoramin a chawm zo lo tih a sawi a. Mizorama lo neituten vaimin an thar chhuahte chu lei zawhsak vek an inhuam reng tih a sawi bawk.
ZPDS Tanhril General Manager Dr Ngursailova sawi danin brown layer awpkeu nan ar awpkeuna khawl an hman mek chawm zo turin artuiah an intodelh a. Broiler ar awpkeu tur erawh phai atangin artui an lakluh a ni.
ZPDS hian an ar awpkeute hi ar vulhtute hnenah Thawhlehni apiangin an zuar chhuak thin a, a keu hlim Rs 50 niin, chawlhkar khat tling tawh chu Rs 70 leh kar tling tawh chu Rs 90-in an zuar chhuak thin a ni.
ZPDS Manager Dr V Lalzarzova pawhin Animal Feed Plant, Ramrikawn atang hian bawng chaw, vawk chaw leh ar chaw an siam chhuak a, ni khatah mamawh dan a zirin quintal 70 atanga quintal 150 thleng an siam chhuak thei tih a sawi a. An ran chaw siam chhuahte chu phai atanga an lakluh thinte aiin a quality a tha zawk tih a sawi bawk.
Minister hi AH & Vetey Secretary Lalzarmawii, IAS leh Director Dr Lalrinpuii Sailo ten an tawiawm a ni.