Chakma Autonomous District Council (CADC) sorkar sum hman dik loh thubuaia court-in thiam loh chantira kum khat lungin tang tura a hrem, BJP MLA Dr BD Chakma chuan Supreme Court thutlukna awm tawhte enin MLA a nihna atanga bân a nih a inrin loh thu a sawi.
Court-in kum khat chhung lungin tang tur leh Rs 10,000 chawi tura a hrem, bail-a chhuah mek Dr BD Chakma chuan nimin khan BJP office-ah thuthar thehdarhtute kawmin convict a nih avanga MLA atanga bân a nih a rin leh rin loh thu a sawi a. “Supreme Court thuthlukna lo awm tawhah member of parliament emaw, legislative assembly member emaw court-in thiam loh a chantir, kum hnih chin lungin tang tura hremte chu MLA atanga chawlhtir tur a ni,” tiin, ani chu kum khat chauh lungin tang tura hrem a nih avangin chawlhtir a nih a inrin loh thu leh MLA atanga chawlhtir pawh ni se pawi a tih loh thu a sawi.
Court-in a laka thutlukna a siam chu high court-a khin let a tum thu Dr BD Chakma chuan a sawi a. “Development sum chu mipui mamawh avanga lo hmang puk kan ni a, FIR thehluh a nih hmain sum kan rul leh vek a, hei hi thubuai chhuitu pawhin min hriatpui a, judgement order-ah pawh ziah lan a ni,” a ti a. Hengte avang hian high court-ah chuan a chak ngei a beisei thu a sawi bawk.
Dr BD Chakma chuan sorkar laipui atanga development sum an hmuh dan leh an hman dan sawifiahin, “Pawisa chu installment-in thla li danah kan dawng a, hemi avang hian hlawh inpek kawngah harsatna a thlen phah,” a ti a. Harsatna sukiang tura thawktuten an lo nawr bawk avangin inhriathiamna nen CADC-a Executive Secretary phalna ngeia development sum chu hlawh atana lo hmang an nih thu leh sum an hman dawnin executive secretary-in dan kalh a nih lo thu a sawi ngei tih a sawi.
Tuichawng bialtu MLA chuan CADC executive secretary hnena sum lak tur chungchang an sawiin intihluihna a awm lo tih a sawi a. He thubuai remnaah hian a mawhphurtu tur dik takin mawh a phur lo va, thuremna chu an pawm lo tih a sawi bawk a ni.