Tunlai European football a player sawi leh ngaihven hlawh ber zing ami Erling Braut Haaland-a’n a pianna ramah a vawikhat nan football a khel a. A club thar Manchester City tan goal hnih khung nghalin Premier League champion in an mamawh ang tak player an nei a. Tun season-ah an elpui turte tan vaukhanna thawm ring tak an chhuah.
London Stadium-ah Manchester City an leng lut a, West Ham United chu harsatna lian nei lovin 2-0 in an hneh.
City tan kum 22 mi Norwegian striker in lei a nih chhan chu a lantir nghal a. Minute 36-naah ama penalty hmuh chu a khung a. Second half-ah Kevin de Bruyne ball siamsak chu an goal hnih nan a khung.
City hnehna chan dan a awlsam a, tunhnai season hnih chhunga team hmasawn leh team lian tana khelh har tak West Ham in inkhel tan tir lama bul an tan that bak sawi tur an nei lova, a tawp thleng an tang tluan thei lo.City thawm a ring
City tana fiahna hautak ni tura ngaih inkhel a ni a, mahse an tan chak a harsa lo. An khingpuite nidang phak loh vang a nihrualin City thatna hmuh hmaih theih a ni lo.
Season liamta khan striker mumal an neih loh avangin a hma lam an bil chang a awm thin. Palian, che rang leh thahrui ngah, goal khung tum ngar ngar Haaland an neih avangin City boruak a danglam a. A hnungah a chawmtu tur an that bawk avangin City lakah fans te beisei a sang.
An mi thar pahnih Julian Alvarez leh Kalvin Philips te pawh second half-ah khelh tir an ni a. Tun nipuiah player inhralh nual mahse City squad a la chhah tha.Bul tan dan duhawm lo
Erik ten Hag-a’n Manchester United manager thar ni chungin a duh loh dan tak ni turin bul an tan a. Brighton & Hove Albion in 2-1 in Old Trafford-ah an hneh.
Graham Potter-a pawlte hian nikum khan United hi hneh takin an lo nghaisa tawh a. Tun tum inkhelah second half-ah nasa taka an inven ngai mahse an chak satliah mai a ni lova, minute 90 chhunga team tha zawk chiang tak an ni.
Mualneitu in bul an tan chhe lova, ball thunun hmasa zawkah an tang. Mahse minute 20 vel an khel tihin Brighton an langsar tan a. Minute 30-naah Pascal Gross chuan Seagulls goal hmasa a khung a. Minute 39-naah an goal hnihna a khung leh a. United goal chhuah pahnihah an tlarhnung a phui loh a chiang hle.
Second half-ah chhuah duh Cristiano Ronaldo dah lutin United an hlauhawm sawt a, Alexis Mac Allister own goal nei ve mahse a bak an khung belh thei tawh lo.
Ten Hag chuan, “Tlawm hi result tul lo tak a ni. Kan bul tan dan a tha a, mahse goal kan chhuah chiah khan kan inkhel a tlahniam. Inrintawkna kan hloh telh telh a, tihsual kan neih chu kan khingpuiten remchangah an la ta thin.”
“Kan hmabak hi hna hautak a ni a, chuvangin rim taka thawh a, inzirchian hnuah kan insiamthat a, hmalam kan pan a pawimawh.” a ti.