Aizawl: Chite Lui Coordination Committee chu an chairman, Chief Minister Zoramthanga hoin Chite Lui tana hmalak mek chungchangte an sawiin an thukhawm.
Thutkhawmah hian Bawngkawn leh Durtlang inkar kham pangper, Bawngkawn Kohhran Biak in kawmchhak chhoa ramngaw leh thing hmun chu a kum tela a chereu thu leh helai hmun hi Chite lui hnar a nih avangin humhalh dan tur an sawi ho a, thutlukna fumfe erawh nei thei loin rawtna bulfuk zawk nena la sawi ho leh turin an dah a ni.
Hei bakah hian Save Chite Lui Committee leh Mizoram PWD tangrualin an siam Reieka plastic road chu hun remchang hmasa berah chief minister hoa hawn nise tih an tih bakah, Aizawl by-pass road laih tur leh leiverhin Chite lui a khawih theih dan turte an sawi ho bawk a ni.