Mizo weightlifter chhuanvawr Birmingham, England a XXII Commonwealth Games neih zawh taka gold medal la Jeremy Lalrinnunga chu Thawhtanni khan Mizoram-ah a lo haw a. Sports miniter hovin an lo hmuak.
Jeremy-a hmuahna hunah hiana nu leh pa leh a unaute bakah Sports Minister Robert Romawia Royte, President, Mizoram Olympic Association, Aizawl West - I bialtu MLA Zothantluanga, sawrkar mi pawimawhte, sports discipline hrang hranga infiammite, sports association hrang hranga hruaitute leh mipui thahnem tak an tel.
Lengpui Airport a chawlhbukah hmuahna inkhawm tawi buatsaih a ni a. Sports minister chuan Mizoram atanga India aiawha infiammi zinga la thleng sang ber Jeremy Lalrinnunga chuan Mizoram a tihmingtha tak zet a. "Zoram mipui ten kan chhuang a, sawrkar ang pawhin kan chhuangin Mizoram Olympic Association pawhin infiammite zawng zawng aiawhin a chungah lawmthu ka sawi a ni", a ti.
Sport minister hian Jeremy-a hmuahna chu a puana hun hmanna hmasa zawk chauh a ni a, Commonwealth Games a India hmeichhe hockey team tana bronze medal la tu Lalremsiami lo haw hunah sawrkar in lawmna hun ropui tak a buatsaih dawn tih a sawi.Olympic beiseitu Jeremy
Kum 19 mi hian Paris a neih tur 2024 Summer Olympics lam an thlir tawh tih a sawi a. Olympics-ah hian tun tuma gold medal a lakna huang kg 67 hi a tel dawn lova, hei vang hian kg 73-ah a chhoh tur thu a sawi chiang.
“Kg 73-ah ka chho dawn a, keimahah chona lian ber tur chu ka rihna tihsan hi a ni dawn. Training leh thildangah Pathian zarah harsatna ka nei ngai lova, amaherawhchu ka harsatna ber thin zawk chu ka rihna tihsan hi a ni. Mahse Pathian zarah ka theih ngei ka beisei a, Paris-ah hian medal lak theih pawh ka inbeisei.” tiin a sawi.
Olympics-ah hian mipa weightlifting-ah kg 61, 73, 89, 102 leh 102+ huangahte inelna buatsaih a ni dawn.
Birmingham a inelna an hmachhawn laiin a inhliam dan chungchang a sawifiah bawk a. “Snatch-ah khan harsatna nei lovin tha takin ka ti thei a, mahse clean & jerk kan neih dawn khan warm up lai atang tawhin ka mal tha a rawn inpawt tan tawh a, kal pawh ka harsat nghal ti tih tawh.”
“Kan team leh ka coach te pawhin tihngaihna an hre lo tawp a, ka tawngtai char char tawp mai. Warm up-ah pawh kg 120 chiah ka chawi a, kan coach te hnenah stage-ah sawn min zawn phei ula ka chawi mai ang, a bak zawng chu Pathian thu thu ni rawh se ka ti a.”
“Kg 160- 165 vela bul tan tur kha ka nia, mahse 154-ah min tan tir a, 160 ka zo leh a, 165 ka chawi dawn khan ka kiu hi ka ti na a, a tihrawl ka ti na ta a ni.” tiin a inhliam dan a sawifiah.
A vaiin kg 315 vel chawi thei tura a inngaih laiin a hliam avangin a chawi thei ta lo tih a sawi bawk.