Kawngchhia siam thuai thuai ni zel teh se
Tlabung leh Lunglei inkar kawngpui chhe zual lai chu a khawihtu lamin a chhe zual lai thawm that a, siamthat thuai an intiam chungin vawiin thlengin siam a la ni lo a, lirthei hmanga veivakte tan tlan ngaihna a awm tawh lo hle. Hemi a nih avang hian Tlabung a lirthei nei inzawmkhawm pawl lian berte chuan nilaini atang hian lungawi lohna lantir a, tlan tawh loh an rel a, an tlan lo a nih leh lek phei chuan a manganthlak zual hle ang.
Hetih lai hian khawthlang lamah Bairabi - Zamuang road chu a chhe leh hle tawh a, siam that hlim chauh a ni chungin hmun thenkhat lai chu lirthei tan tlan ngaihna awm lo khawpin a chhe leh tawh tih hriat a ni a, a paltlang khaw zinga mi Chuhvel leh Saikhawthlir khawtlang hruaitute chuan dan pin rih mai an tintuah run mai bawk.
Hetiang hi tun meka kan ram dinhmun thenkhat a ni. Sorkar in a hmalakna hmasa tur niawm takah hma a la lo a, sum lah a nei lo tih hriat a ni bawk. Chuti chung chuan tuteemaw chu an la hlawk reng tho niin a lang a, zah nachang hria lah an awm hek lo.
Furpui kan hmachhawn lai chu a ni nameuh mai. Kawng pawh hi siam a nih chuan a chhe leh hma ngei ang. Mahse, kan tum tak tak a nih chuan hmasawnna hnathawh hi chu kan kalpui thei reng tih hi a lang a ni. Mipuite hmakhua ngai chungin sorkar pawhin an harsatna tawh hrang hrangte hi chinfelsak thuai teh se.