Israel leh Gaza Strip-a Palestinian helho kara inbeihna thleng chu inkahhai puanga tihtawp rih a ni.
Egypt-in palai hna thawka Israel-in Palestinian Islamic Jihad (PIJ) helho a beihna leh helhovin rocket hmanga an chhan letna chu ni thum a nih hnuah tihtawp a ni.
May, 2021-a ni 11 chhung an indo hnua inbeihna lian leh berah hian Palestinian 44 vel an thi.
Thawhtanni khan Israel chuan Strip kalpawhna a khar pawh a hawng tan a, fuel tank pawh a lut leh tan.
Tun tuma tharum thawhna thleng hi Israel-in Gaza Strip-a kah atanga intan niin sipaite chuan hel pawl atanga beih tumna a awm vanga che niin an insawi a. A hma ni chiahin Israel hian West Bank-a PIJ hruaitu lawk tak an man bawk.
Pathianni zan khan Palestinian health ministry chuan naupang 15-te nen mi 44 thi an awm tih a puang.
Gaza-a health ministry chuan ‘Israeli-te beihna’ avang hian Palestinian tam tak thiin mi 300 chuangin hliam an tuar bawk.
Israel chuan PIJ mi 170 vel beihpui an thlakna, Breaking Dawn tia an sawiah hian an bitum hman tih a sawi a, PIJ member lawk tak tak thatin an leiverh leh an ralthuam dahna an tichhe nual tih an sawi.
Israel Defense Forces (IDF) thupuangtu chuan Palestinian 35 an thi tih an hriat thu a sawi a, “An zinga 11 chu civil mi, inhnamhnawih ve lote an ni a, heng zingah hian chhim lama IDF chetnaa thi hel pawl commander nupuite an tel,” a ti.
“PIJ-in mi 15 an that bawk,” tiin Brig Gen Ran Kochav chuan a sawi.
Gen Kochav chuan Gaza Strip atang hian thil 1,100 kah luh a nih thu leh heng zinga 200 chu Gaza chhunga tla a nih thu a sawi bawk.
Strip-ah hian IDF-in an kahna aiin PIJ-in rocket a kah, a chhunga tla avanga Palestinian thi an tam zawk tih a sawi a; Israel chuan civil mi leh naupang thihna thleng chu an chhui dawn tih a sawi.
Israeli thi an awm lo va, hliam tenau tuar erawh an awm nual.INDO MEK KARAH INKAHHAI PUANNA
Israeli leh PJI inkahhaina a awm theih nan hian Egypt-in palai hna a thawk a, anni hi tun hma lam pawha Israel leh Gaza buainaa palai hna lo thawk tawh thin a ni.
Pathianni zan tlai tawh tak atang khan inkahhai hi kalpui tan a ni a, Israeli sipaite chuan Gaza-a PIJ hmunte chu rocket-a kah chhan let nan inkahhai puan tan hma lawk hian an kap tih an sawi.
Israeli chanchinbute chuan inkahhai puan a nih hnuah pawh Gaza atangin rocket kah a awm zui tho niin an tar lang.
US leh United Nations chuan khawi lam ve ve pawh inkahhai puan hi khauh taka kengkawh turin an ngen.
Thuchhuah a siamah US President Joe Biden chuan inrintawnna a awm thei chu lawmawm a tih thu a sawi a, a tihhlawhtlin nan Gaza-ah tuialhthei leh ni tin mamawhte luhtir leh tawh ni se a duh thu a sawi.
Inbeihna a awm chunga civil mite thihna thlengte chu chhui chhuah ngei tur a nih thu a sawi bawk.
Gaza-ah hian nunau tawrhna a nasa hle a, damdawi thuneitute chuan an damdawi inte chuan generator tihnunna tur tuialhthei an nei mang tawh lo tih an sawi a, inkahhai puanin a zui ta hlauh a ni.