National Investigation Agency (NIA) chuan firfiakte puih thin kaihhnawih an chhuinaah Pathianni khan Jammu & Kashmir-a district 14 laia hmun 40 chuang an dap.
Jammu & Kashmir-a sakhaw behchhan pawl lian ber, dan pawna hnawl, Jamaat-e-Islami hruaitu lawk tak takte chenna in pawh dap tel a ni.
He pawh hi kum 2019 atang khan ram phatsan zawnga chea puh an nih avangin sorkar chuan a khap (ban) an ni a. Hemi hnuah hian an hruaitu eng emaw zat man an ni tawh bawk.
Pathiannia NIA chet chhuahna hi inlak hran tum pawl leh firfiakte kaihhnawiha he lai biala a chetna lian ber a tling a. Thla khat chhunga beihpui an thlak vawi thumna a ni bawk.
Hmun hrang hrang an dapnaah hian J&K police leh CRPF-in an pui a. Doda, Kishtwar, Ramban, Anantnag, Budgam, Rajouri, Doda leh Shopian bakah hmun dang dangah an dap.
Agency-in thuchhuah an siamah chuan dan pawna hnawl pawl hian mi dang tanpuina tur leh an pawl inrelbawlna tur anga sawiin thawhhlawm an khawn a; mahse, an khawn chhuahte chu ‘tharum thawhna leh ram pawi sawi zawnga chetna atan an hmang leh thin’ niin an tar lang.
“Jamaat-e-Islami-in sum an tuakte hi firfiak pawl hrang hrang - Hizb-ul-Mujahideen, Lashkar-e-Taiba leh a dangte puihna atana hman thin a ni,” an ti bawk.