Aizawl: Ram hmasawnna hrang hrang buaipuia New Delhi-a cham mek, EF&CC Minister T.J. Lalnuntluanga chuan Zirtawpni zan khan Union Tourism, Culture Minister G. Kishan Reddy, Development of North Eastern Region of India (DoNER) minister ni bawk chu New Delhi-a a chenna inah a hmu a, Champhai Tlangsam hmun hluia Tagore Cultural Complex din tum chungchang leh thil pawimawh dangte a sawipui.
EF&CC minister chuan Champhai Tlangsam hmun hluia Tagore Cultural Complex din tum chungchangah hian sorkar thar a pian hlim phat atangin hma lak nghal a ni tih sawiin, “Hemi atan hian sorkar laipui pawh vawi duai lo dawr a ni tawh a ni,” a ti.
Hripui leh harsatna hrang hrang avanga a hlawhtlinna hmuh a la nih mai loh avang leh union minister hnen atanga thudawnin Tagore Cultural Complex din tum chungchang chu National Appraisal Committee (NAC)-in a ngaihtuah tur thu January 17, 2022 khan lehkha hmanga hriattir a nih thu tar langin, chak zawka hma laksak turin union minister chu a ngen.
Reddy pawhin Tagore Cultural Complex din tum chungchangah theihtawp chhuaha hma lakpui a inhuam thu leh a tul anga hma lak nghal a nih tur thu forest minister hi a hrilh.
EF&CC minister hi Additional Resident Commissioner Alexander V. Chongthu, MCS; Pu Pee Lee Ete, IFS, Conservator of Forest (Eastern Circle), EF&CC department leh Thomas Lalrammawia, MJS, Deputy Secretary, Law & Judicial Department ten an tawiawm a ni.